बाराको परवानीपुर गाउँपालिका–१ रहरियाडीमा दुई जनाको हत्या भएको घटनामा प्रहरीले बुहारीलाई नियन्त्रणमा लिएको छ।
बुधबार बिहान २ बजेअघि रहरियाडीमा ५२ वर्षीया सुमित्रा देवी र उनका छोरा ३२ वर्षीया रामेश्वर मण्डलको हत्या भएको घटनामा प्रहरीले रामेश्वरकी श्रीमती मनितादेवीलाई नियन्त्रणमा लिएको हो।
प्रहरीले उनलाई सोधपुछका लागि नियन्त्रणमा लिएको जिल्ला प्रहरी कार्यालय बाराका प्रमुख एसपी नरेन्द्र कुँवरले जानकारी दिए।
'सोधपुछका लागि उहाँलाई नियन्त्रणमा लिइएको हो,' उनले भनेका छन्।
गएराति एक व्यक्ति घरभित्र छिरेर अन्धाधुन्ध धारिलो हतियार प्रहार गरेका थिए। ती व्यक्तिको खोजी भइरहेको प्रहरीले जनाएको छ।
घटना हुँदा सुमित्राको घरमा ८ जना सदस्य थिए।
सुमित्रासँगै उनका श्रीमान जगरूक मण्डल, छोरी किरणदेवी, बुहारी मनितादेवी र उनका दुई छोरा, छोरी रिनाकुमारी र नाति गरी ८ जना थिए।
जगरूक,मनितादेवी र किरणदेवी घाइते भएका छन्। त्यसमा पनि जगरूक गम्भीर रहेको प्रहरीले जनाएको छ।
उनीहरूको परवानीपुरकै एलएस न्युरो अस्पतालमा उपचार भइरहेको छ।
मनिता राति शौचालय निस्कँदा उनीसँगै सुमित्रा पनि निस्किएकी थिइन्।
सुमित्राको घरबाहिर नै हत्या भएको प्रहरीले जनाएको छ।
शौचालयको छेउमै उनको शव भेटिएको थियो। रामेश्वरको शव प्यासेजमा भेटिएको प्रहरीले जनाएको छ ।
घटनामा मनिता सामान्य मात्रै रहेको जिल्ला प्रहरी प्रवक्ता प्रहरी नायब उपरीक्षक विजयराज पण्डितले बताए। अन्य विषयमा अनुसन्धान भइरहेको उनले बताएका छन्।
‘घटनाको अनुसन्धानका लागि परिवारका सदस्य र छिमेकीहरु कुराकानी गर्नु नै पर्ने हुन्छ,’ उनले भने, ‘घटना कसले र कसरी घटाएको भन्ने बारे अनुसन्धान भइरहेको छ।’
घरबाट एउटा बच्चाले गएर छिमेकीलाई जानकारी गराएपछि गाउँलेले घटनाबारे जानकारी पाएका थिए।
बिहान २ बजेतिर घटनाबारे जानकारी पाएको र घाइते दाजु र छोरीलाई अस्पतालमा ल्याएर भर्ना गरेको मृतक रामेश्वरका काका स्वरुप महतोले बताएका छन्।
जिल्ला प्रहरी कार्यालय बाराका प्रमुख प्रहरी उपरीक्षक नरेन्द्र कुँवर घटनाबारे जानकारी पाए लगत्तै घटना स्थलमा पुगेका छन् । उनले घटना स्थलमा आमा र छोरा मृत अवस्थामा फेला परेको र बुवा, सानी छोरी र बुहारी घाइते रहेको जानकारी दिए ।
‘रातिदेखि नै घटनास्थलमा छु, धारिलो हतियार प्रयोग गरेर हत्या गरिएको देखिन्छ, कोठामा संघर्षका चिह्न पनि देखिएको छ,’ उनले भने, ‘घटनास्थलमा मुचुल्का उठाइसकेका छौं।’
घटनाको अनुसन्धानका लागि तालिम प्राप्त कुकुर पनि परिचालन गरिएको छ।
-1746009348.jpg)
