तीन उपाध्यक्षसहित केन्द्रीय समितिका ७ जनाले अखिल नेपाल फुटबल संघ (एन्फा) को बैठक बोलाउन माग गरेका छन्।
७ जनाले बैठक बस्न माग गर्दै आज एन्फामा पत्र दर्ता गराएका छन्। बैठक माग गर्नेमा वरिष्ठ उपाध्यक्ष पंकजब्रिकम नेम्बाङ, उपाध्यक्षहरू कृष्णबहादुर थापा र वीरबहादुर खड्का तथा सदस्यहरू किरण राई, दिनेश व्यन्जनकार, निरोज खड्गी र दावा लामा छन्।
९ महिनाभन्दा बढि समयसम्म एन्फा बैठक बस्न नसकेकाले पत्र दर्ता गराएको वरिष्ठ उपाध्यक्ष नेम्बाङको भनाइ छ।
‘अखिल नेपाल फुटबल संघको केन्द्रीय कार्यसमितिको बैठक लामो समयदेखि बस्न सकिरहेको छैन। जसले गर्दा फुटबल खेलको विकासको सम्बन्धमा विभिन्न महत्त्वपूर्ण विषयहरुमाथि छलफल हुन नसक्दा सिङ्गो फुटबल खेलको विकासमा गतिरोध देखापरेको र संघ संचलनमा विधि, प्रक्रियाबिहिन ढंगबाट संचालन भइरहेको छ,’ पत्रमा भनिएको छ।
‘आगामी २०७९ बैशाख महिनामा संघको साधारण सभा र निर्वाचन गर्नु पर्ने भएकोले पनि तत्काल बैठकबाट जिल्ला, प्रदेश र केन्द्रको साधारण सभा र निर्वाचन सम्बन्धी कार्यतालिका लगायत फुटबल खेलको विकाससँग सम्बन्धी जिल्ला लिग, प्रदेश लिग, ए, बी र सी डिभिजन लिग, राष्ट्रियलिग संचालन बारे छलफल गर्न आवश्यक देखिएको छ। अन्य आवश्यक विषयहरूमा समेत छलफल गर्नको लागि संघको अध्यक्षज्युलाई पटकपटक अनुरोध गर्दा पनि बेवास्ता गर्नु भएकोले संघको विधानको धारा ३७ को उपधारा २ बमोजिम कार्यसमिति बैठक आयोजनाको माग गर्दछौं।’
-1746009348.jpg)
