भारतीय रियालिटी शो ‘बिग बोस १३’ बाट चर्चामा आएकी अभिनेत्री, मोडल तथा गायिका शहनाज गिल बलिउडमा डेब्यू गर्दैछिन्।
उनले सलमान खानको फिल्म ‘कभी ईद कभी दिवाली’ बाट बलिउडमा डेब्यू गर्न लागेकी हुन्।
भारतीय सञ्चार माध्यम बलिउड लाइफका अनुसार उनले फिल्मको छायांकन सुरु गरिसकेकी छन्। ‘म यो फिल्मलाई लिएर निकै उत्साहित छु। किनकी यो फिल्मबाट मेरो ठूलो सपना पूरा हुँदैछ,’ उनले भनिन्।
फिल्म छायांकनको लागि मुम्बईमा एक भव्य सेट तयार पारिएको छ।
फरहाद सामजीले निर्देशन गरिरहेको फिल्ममा सलमानसँगै दक्षिण भारतीय अभिनेत्री पूजा हेगडेको पनि मुख्य भूमिका छ। फिल्ममा आयुष शर्मा, राघव जुयालको पनि अभिनय रहनेछ।
‘बिग बोस १३’ मा सलमानले होस्टको भूमिका निभाएका थिए भने शहनाज प्रतिस्पर्धीको रुपमा रहेकी थिइन्। आफूलाई पन्जाबको कट्रीना कैफ भन्न रुचाउने शहनाज उक्त शोबाट सलमानसँग निकट भएकी हुन्। उनी पछिल्लो समय सलमान खानको घरमा इदको पार्टी मनाउन समेत पुगेकी थिइन्।
उनले ‘सत श्री अकाल इंग्ल्याण्ड, काला शाह काला, हौसला राख’ जस्ता पन्जाबी फिल्ममा अभिनय गरिसकेकी छन् भने सयभन्दा बढी म्युजिक भिडिओमा अभिनय गरिसकेकी छन्।
