दीपेन्द्र लामाको निर्देशनमा बनिरहेको फिल्म 'नांगो गाउँ' को प्रदर्शन मिति घोषणा गरिएको छ।
आगामी तीजको अवसर पारेर फिल्म भदौ २९ गतेदेखि प्रदर्शन हुनेछ। आइतबार निर्माण टिमले फिल्मको एक पोस्टर सार्वजनिक गर्दै प्रदर्शन मिति घोषणा गरेका हुन्। सार्वजनिक पोस्टरमा कुनै पनि कलाकारलाई प्रस्तुत गरिएको छैन तर पोस्टर हेर्दा राजनीतिक पृष्ठभूमिमा फिल्म बनेको अनुमान लगाउन सकिन्छ।
फिल्ममा दयाहाङ राई, मिरूना मगर, कार्म, साम्राज्ञी राज्यलक्ष्मी शाह, शिशिर वाङ्देल, बुद्धि तामाङ, रविन्द्र झाको मुख्य भूमिका छ। फिल्मको कथा निर्देशक लामाले नै तयार पारेका हुन्।
हिमाल शर्माको प्रस्तुतिमा तयार भएको फिल्ममा जय श्रेष्ठको लगानी छ।
‘नांगो गाउँ’ मा दयाहाङ र मिरूनाले तेस्रो पटक सहकार्य गरेका हुन्। यसअघि उनीहरू फिल्म ‘कबड्डी ४’ र ‘जारी’ मा जोडीको रूपमा देखिएका थिए।
