नेपाली कम्युनिष्ट पार्टीका अध्यक्ष पुष्पकमल दहाल प्रचण्डले अहिलेको व्यवस्थामा आएको परिवर्तन र प्रणालीमा कुनै खतरा नरहेको बताएका छन्।
सुनसरीमा थारु समुदायको जितीया पर्वमा सहभागी भएका अध्यक्ष दाहालले परिवर्तन र प्रणालीमा खतरा आयो भन्ने कुरा सत्य नरहेको बताएका छन्।
साथै उनले अराजक गतिविधिहरु ठाउँठाउँमा बढेको समेत बताएका छन्।
‘अहिले यो परिवर्तन र प्रणालीलाई खतरा आयो भन्ने सत्य होइन,’ अध्यक्ष दहालले भने, ‘अराजक गतिविधि ठाउँ ठाउँमा बढेको देखियो, यसको प्रतिवाद सबै राजनीतिक दल र सरकारले गर्नुपर्छ।’
उनले यसबारे संसदमा सहभागी राजनितिक दलहरुबीच साझेदारी भएको जानकारी समेत दिए। उनले त्यस्ता प्रवृतिलाई भौतिक रुपमा नभइ राजनीतिक र बैचारिक रुपमा परास्त गर्नुपर्ने प्रष्ट पारे।
अध्यक्ष दाहालले अराजक गतिविधिहरु बढेकोबारे पटक पटक बोल्दै आएका छन्। सरकार र पार्टी दुबै भ्रष्टाचार विरुद्ध लागेको समेत उनले बताए।
त्यस्तै उनले संघीय लोकतान्त्रिक गणतन्त्र र संविधानको रक्षाका निम्ति सबै राजनीतिक दलहरु एकै ठाउँमा रहेको दाबी समेत गरे।
सरकारले कामै नगरेको भन्ने अभिव्यक्ति पनि गलत रहेको बताउँदै उनले विभिन्न मौलिक हक सम्बन्धी कानून बन्नु सकारात्मक रहेको तर्क गरे।
सरकारको भारत र चीनसँग राम्रो सम्बन्ध बनेको उनको दावी छ।