लुम्बिनी प्रदेशका मुख्यमन्त्री शंकर पोखरेलले पार्टीभित्रको अन्तरविरोधलाई प्रदेश सभासम्म ल्याए प्रदेशका जनतालाई स्वीकार्य नहुने बताएका छन्।
प्रदेशसभामा नेकपा एक भएको भन्दै त्यसलाई विभाजित गर्ने प्रयास कसैले गरेमा प्रदेशबासीका लागि स्वीकार्य नहुने उनले बताए।
माघी पर्वको अवसरमा मुख्यमन्त्री निवासमा बुधबार आयोजित शुभकामना आदानप्रदान कार्यक्रममा बोल्दै मुख्यमन्त्री पोखरेलले संघमा देखिएको पार्टी भित्रको अन्तरविरोधका बाछिटाहरूलाई प्रादेशिक तहसम्म पर्न नदिई राजनीतिक संस्कृतिको विकास गरिने समेत बताए।
मुख्यमन्त्री पोखरेलले केन्द्रमा देखिने अन्तरविरोधलाई प्रदेश र स्थानीय तहसम्म ल्याउने कुरा लोकतन्त्रको विकास र सुदृढीकरणका लागि समेत उपयुक्त नहुने बताए।
मुख्यमन्त्री पोखरेलले लुम्बिनी प्रदेश धार्मिक, सांस्कृतिक दृष्टिकोणबाट धनी रहेको भन्दै यहाँका सांस्कृतिक महत्वका पर्वहरूलाई समृद्धिसँग जोड्न सकिने समेत बताए। उनले मौलिक संस्कृतिको जगेर्नाका लागि परम्परागत संस्कृतिलाई होमस्टेसँग जोडेर पर्यटनको विकास गर्न सकिने बताए।
माघे संक्रान्ति र माघीको अवसरमा लुम्बिनी प्रदेश सरकारले हरेक वर्ष माघी मिलन कार्यक्रम आयोजना गर्दै आएको छ। साथै, प्रदेश सरकारले माघी र माघे संक्रान्तिको अवसरमा दुई दिन सार्वजनिक बिदा समेत दिँदै आएको छ।
लुम्बिनी प्रदेशका १२ जिल्लामा बिहीबार र शुक्रबार माघी पर्वको बिदा दिइएको आन्तरिक मामिला तथा कानुन मन्त्रालयले जानकारी दिएको छ।
थारु समुदायको बाहुल्यता रहेका लुम्बिनी प्रदेशका दाङ, कपिलवस्तु, बाँके, बर्दिया र रुपन्देहीमा समेत माघी पर्वलाई सबैभन्दा महत्वपूर्ण पर्वको रुपमा मनाउने गरिन्छ। माघे संक्रान्तिको अवसरमा लुम्बिनी प्रदेशका विभिन्न तीर्थस्थलहरूमा संक्रान्ति मेलासमेत लाग्ने गर्छन्।
