गण्डकी प्रदेशमा विपक्षी गठबन्धनबाट प्रस्तावित मुख्यमन्त्री कृष्णचन्द्र नेपाली पोखरेलले आफ्नो सरकार बनाउनुको विकल्प नरहेको बताएका छन्।
प्रदेश प्रमुख सीताकुमारी पौडेललाई भेटेर मुख्यमन्त्रीको दाबी पत्र पेश गरेपछि प्रतिक्रिया दिँदै उनले आफ्नो सरकार बन्ने विश्वास व्यक्त गरे।
एमाले नेतृत्वको सरकारले विश्वासको मत नपाएको भन्दै उनले बहुमत सांसदसहित उपस्थित भएर सरकारको दाबी गरेकाले यो गठबन्धन सरकारको विकल्प नभएको बताए।
‘अहिले जुन संवैधानिक व्यवस्था छ, सर्वोच्चले पनि नजिर कायम गरेको छ, त्योभन्दा महत्वपूर्ण ३१ जना माननीय सशरीर आएर सनाखत गरेका छौं,' उनले भने, ‘हिजो मात्र मुख्यमन्त्री पृथ्वीसुब्बा गुरुङले माग्नुभएको विश्वासको मत असफल भएको छ, यो भन्दा अरु विकल्प छैन।’
विपक्षी गठबन्धनबाट नेपाली काँग्रेसका १५ जना, माओवादी केन्द्रका ११ जना (सभामुख बाहेक) जनमोर्चाका २ जना, जनता समाजवादी पार्टीका २ जना र स्वतन्त्र सांसद दीपक मनाङे सहित ३१ जना सांसद प्रदेश प्रमुखको निवास पुगेका थिए।
उनीहरुले सरकारको दाबी गर्दै हस्ताक्षर समेत बुझाएका छन् भने हस्ताक्षरको सनाखत समेत गराएका छन्।
प्रदेश प्रमुखलाई ३१ जना नै सांसद उपस्थित भएकाले हस्ताक्षरको सनाखत गर्न आग्रह गरेको र सोही अनुसार सनाखत भएको उनले बताए।
मुख्यमन्त्रीको दाबी पेश गरेपछि प्रमुख पौडेलले भोलि ३ बजेसम्मको समय दिएकाले त्यतिबेला खबर गर्ने बताएको नेपालीले जानकारी दिए।
काँग्रेस गण्डकी संसदीय दलका नेता समेत रहेका नेपालीले असार १ मा बजेट ल्याउनुपर्ने र त्यसअघि सरकारले नीति तथा कार्यक्रम ल्याउनुपर्ने भएकाले नियुक्ति र सपथ ग्रहण चाँडै गराउन समेत आग्रह गरेको बताए।