चितवनको भरतपुरमा नेकपा एमालेको महाधिवेशनको रौनक छाएको छ।
शुक्रबार सुरू हुने एमालेको दशौं महाधिवेशनका लागि एमालेका प्रतिनिधि तथा नेता/कार्यकर्ता बिहीबार चितवन पुग्दैछन्।
अध्यक्ष केपी शर्मा ओली बिहीबार दिउँसो भरतपुर पुगिसकेका छन्। श्रीमती राधिका शाक्यसँगै ओली अपरान्ह सवा १ बजे बुद्ध एयरको जहाजबाट भरतपुर विमानस्थल आइपुगेका छन्।
उनीनिकट नेताहरू बिष्णु पौडेल र शंकर पोखरेल पनि आजै जहाज चढेर चितवन पुग्दैछन्।
एमाले महासचिव ईश्वर पोखरेल, सचिव योगेश भट्टराईलगायत नेताहरू केही दिनअघि नै चितवन पुगिसकेका थिए।
अध्यक्षमा उम्मेदवारी घोषणा गरेका उपाध्यक्ष भीम रावल गाडीमा चितवन आउँदै छन्।
रावल अहिले बाटोमै रहेको उनीनिकट स्रोतले जानकारी दिएको छ।
एमालेकी उपाध्यक्ष तथा बागमती प्रदेशकी पूर्वमूख्यमन्त्री अष्टलक्ष्मी शाक्य पनि गाडीमै चितवन गएकी छन्।
स्रोतका अनुसार शाक्य, उपाध्यक्ष युवराज ज्ञवाली, स्थायी कमिटी सदस्य अमृत बोहोरा र रघुजी पन्त एउटै गाडीमा चढेर चितवन आउन लागेका छन्। यी चारे नेताका निजी गाडी छैनन्। शाक्यले बागमती प्रदेशको प्रमुख प्रतिपक्षी दलको नेताको हैसियतले पाएको गाडीमा उनीहरू आज चितवन आउन लागेका हुन्।
एमाले उपमहासचिव घनश्याम भुषालले पनि गाडीमै चितवन आउन लागेका छन्।
एमालेले भोलि हुने उद्घाटन कार्यक्रममा पाँच लाख मानिस सहभागी हुने दाबी गरेको छ। देशभरिबाट कार्यकर्ता ओसार्न ४ हजार बढी बस परिचालन हुने महाधिवेशन आयोजक समितिले जानकारी दिएको छ।