प्रतिनिधि सभाले संसदको क्यालेण्डर निर्माणको तयारी सुरू गरेको छ।
सभामुख देवराज घिमिरेले प्रमुख दलका सचेतकहरूसँग क्यालेण्डर निर्माणबारे छलफल गरेका हुन्।
संघीय संसदका कार्यवाहक महासचिव पद्मप्रसाद पाण्डेयका अनुसार तत्काल एउटा अधिवेशनको क्यालेण्डर निर्माण गर्न नसकिए पनि कम्तीमा १५ दिनदेखि एक महिनाको क्यालेण्डर निर्माण गर्ने विषयमा छलफल भएको हो।
संसद सचिवालयले तयार पारेको प्रस्तावमा सातामा तीन दिन संसदको बैठक गर्ने प्रस्ताव छ।
'दिन बिराएर हप्तामा ३ दिन संसद र ३ दिन समिति बैठक चलाउने प्रस्ताव गरिएको छ,' पाण्डेयले भने, 'प्रमुख सचेतकहरू सकारात्मक हुनुहुन्छ।'
त्यस्तै, संसदको एक दिनको बैठकमा विशेष समय सञ्चालन गरे लगत्तैको अर्को बैठकमा सञ्चालन नगर्ने तयारी सचिवालयको छ।
विशेष समयमा सांसदहरूले दलगत आधारमा बोल्न निश्चित समय पाउँछन्। शून्य समय भने हरेक दिन संसदमा सञ्चालन गर्ने प्रस्ताव सचिवालयको छ। शून्य समयमा सांसदहरूले नामको वर्णानुक्रम अनुसार समय पाउँछन्। त्यस्तै, हरेक बैठकमा कुनै न कुनै विधेयकमाथि छलफल गराउने तयारी सचिवालयको छ।
नेपालको संसद लामो समयदेखि क्यालेण्डरविहीन ढंगले चल्दै आएको छ।
प्रतिनिधि सभाको नियमावली निर्माणको क्रममा राष्ट्रिय स्वतन्त्र पार्टीकी सांसद सुमना श्रेष्ठले क्यालेण्डर निर्माण गर्ने प्रस्ताव राखेकी थिइन्। तर प्रतिनिधि सभा नियमावलीमा आवश्यक पर्दा क्यालेण्डर बनाउन सक्ने गरी बृहत ढंगले मात्र विषय समेटियो। नेपालको संसदमा लामो समयसम्म राजनीतिक दलहरूले विभिन्न माग राखेर अवरोध गर्ने गरेका कारण क्यालेण्डर निर्माण र कार्यान्वयन चुनौतीपूर्ण छ। संविधान सभाको पहिलो निर्वाचनपछि संविधान निर्माणको क्यालेण्डर निर्माण गरिएको थियो। तर त्यस्तो क्यालेण्डर संविधान सभाले पालना गर्न सकेन।
संसदीय समितिहरू पनि क्यालेण्डर अभावमा सभापतिले चाहेको अवस्थामा मात्र बस्ने गरेका छन्। केही समयअघि राष्ट्रिय स्वतन्त्र पार्टीका सांसद रवि लामिछानेले राज्य व्यवस्था समितिको बैठक राख्न आग्रह गर्दै समितिका ज्येष्ठ सदस्य चित्रबहादुर केसीलाई पत्र नै बुझाएका थिए।
संसदीय समितिहरू अघिल्लो दिन सूचना गरेर भोलिपल्ट बस्ने जस्ता घटना पटक पटक भएका छन्। क्यालेण्डरविहीन ढंगले समितिहरू चल्दा आवश्यक सांसदहरू नजुट्दा बैठक समेत स्थगित गर्नुपरेको छ।
