नेपाली कांग्रेसका सांसद प्रदीप पौडेलले चिनियाँ राजदूत छन सोङलाई भेटेर रिङ रोडअन्तर्गत कलंकी-चाबहिल (धोवीखोला) सडक छिटो निर्माण गर्न आग्रह गरेका छन्।
यसअघि नेपालसँग भएको सम्झौताअनुसार चिनियाँ पक्षले सडक निर्माणको काम गर्नुपर्ने भनाइ पौडेलको थियो।
चक्रपथको कलंकी-धोविखोला निर्माणका विषयमा बिहीबार चिनियाँ राजदूत सोङसँग कुराकानी भएको पौडेलले बताए।
‘राजदूतसँगको भेटमा मैले कलंकी-धोवीखोला सडक निर्माणको विषयमा कुराकानी गरेँ। यसको निर्माणमा यसअघि भएको सम्झौताअनुसार चिनियाँ पक्षले काम गर्नुपर्यो भन्ने मेरो राय थियो,’ पौडेलले सेतोपाटीसँग भने।
जबाफमा राजदूत सोङले नेपाल सरकारले आफ्नो काम सकेको जानकारी दिएलगत्तै चिनियाँ पक्षले काम सुरू गर्ने बताएका थिए।
कलंकीदेखि बसुन्धरा चक्रपथ निर्माणको सम्झौता सन् २०१८ मा भए पनि अहिलेसम्म काम हुन सकेको छैन। सडक छेउछाउका रूख कटान गरे पनि अलपत्र छाडिएका छन्।
घाम लागेका बेला धुलो र पानी परेका बेला हिलो हुने समस्या रहेको स्थानीय बासिन्दाले गुनासो गरेका छन्।
पौडेलसहित काठमाडौंबाट प्रतिनिधि सभामा प्रतिनिधित्व गर्ने कांग्रेस र रास्वपाका सांसदहरूले कलंकी-चाबहिल सडक छिटो निर्माणको मागसहित संसदमा जरूरी सार्वजनिक महत्वको सङ्कल्प प्रस्ताव पनि दर्ता गरेका छन्।
काठमाडौंका सांसदहरूले चिनियाँ पक्षले उक्त सडक निर्माण नगर्ने भए नेपाल सरकारले आफ्नै स्रोतबाट निर्माण गर्नुपर्नेसमेत संकल्प प्रस्तावमा समावेश गरेका छन्।
