महालक्ष्मी नगरमा कन्ट्याक ट्रेसिङमार्फत गरिएको २ सय १३ जनाको परीक्षण रिपोर्ट नेगेटिभ

सेतोपाटी संवाददाता

काठमाडौं, असार ३१

महालक्ष्मी नगरपालिकामा कन्ट्याक ट्रेसिङ मार्फत गरिएको कोरोना परीक्षणमा सबैको रिपोर्ट नेगेटिभ आएको छ।

नगरपालिकामा कोरोना संक्रमित बढ्दै गएपछि गत शनिबार दुई सय १३ जनाको स्वाब संकलन गरिएको थियो। संकलन गरिएका सबैको रिपोर्ट नेगेटिभ आएको महानगरका प्रमुख रामेश्वर श्रेष्ठले जानकारी दिए।

संक्रमितसँग सम्पर्कमा गएको आशंकामा ७४ जना र समुदायका एक सय ३९ जनाको पिसिआर परीक्षण गरिएको थियो।

'परीक्षण गरिएका सबै जनाको नतिजा नेगेटिभ आएको खबर सुनाउन पाउँदा खुसी लागेको छ,' बुधबार जारी विज्ञप्तीमा भनिएको छ,'यसबाट कोरोना संक्रमण समुदाय तहसम्म पुग्न सकेको छैन भन्ने पुष्टि भएको छ।'

उक्त नगरको वडा नम्बर आठ लुभूको एकै घरका १० जनामा कोरोनाभाइरसको संक्रमण देखिएको थियो। बल्खुस्थित वयोद्या अस्पतालमा कार्यरत ल्याब टेक्निसियनमा असार १७ गते कोरोना सङ्क्रमण पुष्टि भएको थियो।

उनी अहिले उपचारपछि घर फर्किसकेकी छिन्। उनको परिवार र भाडामा बस्नेहरूको परीक्षण गर्दा १० जनामा संक्रमण देखिएको थियो। त्यस्तै वडा नम्बर ८ मा मात्रै १५ जना संक्रमित छन्।

उनीहरूको उपचार बलम्बुस्थित अस्पताल भइरहेको वडा सदस्य अनिल श्रेष्ठले जानकारी दिए।

'आइसोलेसनमा बसिसकेपछि गरिएको परीक्षणमा उहाँहरूको नेगेटिभ आएको छ', उनले भने, 'अब दुई पटक नेगेटिभ आएपछि उहाँहरू डिस्चार्ज हुनुहुन्छ।'

प्रकाशित मिति: बुधबार, असार ३१, २०७७ ०५:२८

सिफारिस