रातो मच्छिन्द्रनाथको रथमा काठको काम गर्ने दिलकुमार बाराहीलाई 'झान्जु अन्तर्राष्ट्रिय अवार्ड' हस्तान्तरण गरिएको छ।उनलाई रातो मच्छिन्द्रनाथको रथ बनाउँदा काठको काम गर्ने शिल्पीका रूपमा पुरस्कृत गरिएको हो।
दक्षिण कोरियाको झान्जु नगरले संसारभरिका अमूर्त सांस्कृतिक सम्पदा प्रवर्द्धन गर्न हरेक वर्ष दिँदै आएको यो अवार्ड यसपालि तीनवटा देशका सांस्कृतिक सम्पदाले पाएका हुन्। पहिलो नम्बरमा नेपालको नाउँ छ भने त्यसपछि इटाली र ताजिकिस्तान छन्।
दस हजार अमेरिकी डलरसहितको यो अवार्ड पाएका उनलाई आइतबार कुरिअरमार्फत् अवार्ड पठाइएको हो।
बाराही गुठीका नाइके दिलकुमार बाराहीलाई डेढ महिनाअघि अनलाइन कार्यक्रमबीच झान्जु अवार्ड दिने घोषणा गरिएको थियो। अवार्ड विजेताहरूको नामावली भने तीन महिनाअघि नै घोषणा गरिएको हो।
झान्जु अन्तर्राष्ट्रिय अवार्डसहित दिलकुमार बाराही। तस्बिर स्रोत: शैलेश राजभण्डारी
यो अवार्ड नेपालले पाउनुमा सम्पदा संरक्षणविद् मोनालिसा महर्जनको ठूलो हात छ।
पोर्चुगलको डी इभोरा विश्वविद्यालयबाट सम्पदा संरक्षणमा पिएचडी गरेकी मोनालिसाले नै दिलकुमार बाराहीको नाम र उनको शिल्पलाई अन्तर्राष्ट्रिय प्रतिस्पर्धामा सामेल गराएकी हुन्। यसको निम्ति बाराहीसँग अन्तर्वार्ता लिने, उनको कामको विवरण तयार पारेर आवेदन भर्ने, फोटो र भिडिओ खिचेर पठाउने सबै काम मोनालिसाले नै गरेकी थिइन्।
यस क्रममा पद्मसुन्दर जोशी, शैलेश राजभण्डारी, आशुतोष बाराही, सन्देश मुनिकार, ऋषि अमात्य, ललितपुर महानगरपालिका राजु महर्जन लगायतले फोटो, भिडिओ र अन्य सन्दर्भ सामग्री संकलनमा मद्दत गरेको उनले बताइन्।
‘उहाँलाई पुरस्कार दिनु भनेको सिंगो रातो मच्छिन्द्रनाथको रथयात्राले जीवित सांस्कृतिक सम्पदाका रूपमा अन्तर्राष्ट्रिय सम्मान पाउनु हो,’ उनले सेतोपाटीसँग भनिन्।
अन्तर्राष्ट्रिय अवार्ड पाएकोमा प्रतिक्रिया दिँदै बाराहीले भने, ‘यो रातो मच्छिन्द्रनाथको जात्रा चलाउने सबै गुठीहरूको निम्ति खुसीको खबर हो। हाम्रो सिंगो जात्राले नै अन्तर्राष्ट्रिय सम्मान पाएको हो।’
दिलकुमार बाराही को हुन्? उनको परिवार कसरी र कहिलेबाट रातो मच्छिन्द्रनाथको जात्रासँग जोडियो? यसको सम्पूर्ण कथा पढ्न यहाँ क्लिक गर्नुहोस्:
झान्जु अन्तर्राष्ट्रिय अवार्डको अनलाइन समारोहमा दिलकुमार बाराही र मोनालिसा महर्जन। तस्बिर: दिलकुमार बाराहीको फेसबुकबाट
-1746009348.jpg)
