विभागीय मन्त्रीले चासो देखाउँदा वैदेशिक रोजगारीमा जान लागेका युवा एजेण्टको ठगीबाट जोगिएका छन्।
भाषा परीक्षा उत्तिर्ण गरी कोरिया जाने क्रममा रहेका युवालाई एजेण्टले अबैध ढंगले रकम असुल्न खोजेको सूचना पाएपछि श्रम, रोजगार तथा सामाजिक सुरक्षा मन्त्री कृष्णकुमार श्रेष्ठले तत्काल पहल कदमी लिँदा युवाहरू ठगिनबाट जोगिएका हुन् ।
वैदेशिक रोजगारीमा जान चाहनेले एजेण्टबाट भोग्नुपरेका समस्याका बारेमा सञ्चारमाध्यममा समाचार आउने गरे पनि त्यसबारे मन्त्री स्वयमले चासो देखाउने गरेका थिएनन्। तर मन्त्री श्रेष्ठ भने कोरिया पठाउँदै आएका एजेन्टले बन्धक जसरी राखेका युवालाई भेट्न आफैं होटल पुगेका थिए।
मंगलबार राती मन्त्रीको मोबाईलमा आएको सूचनाका आधारमा उनी सुरक्षाकर्मी, श्रम विभागका अधिकारीसहित युवालाई राखिएको होटल बाल्टिक इन सिनामंगल पुगेका थिए। बुधबार साँझ कोरिया उड्न लागेका दजनौं युवालाई अनिवार्य सात दिन क्वारेन्टीन बस्नुपर्ने भन्दै संयुक्त संघर्ष समितिको नामबाट एक युवाको सिफारिसमा एयरपोर्टस्थित होटल बाल्टिक इनमा जर्बजस्त राखिएको थियो। पीडित युवाले आफूहरूलाई एजेण्टले विभिन्न बहानामा पैसा असुल्न खोजेको गुनासो मन्त्रीसँग गरेका थिए।
पीडीतको गुनासो सुनेपछि मन्त्री श्रेष्ठले होटलमा बन्धक बनाउने काममा संलग्नलाई कारवाही गर्न निर्देशन दिए। ‘म पैसा कमाउन मन्त्री भएको मान्छे होइन, केही गर्न मन्त्री भएको मान्छे हुँ। जो-जोसँग सात दिनको पैसा लिनुभएको छ, सबको फिर्ता गर्नुहोस्। अब तपाईँलाई मर्का पर्यो होला, कसले एग्रिमेन्ट गर्यो ऊ सँग माग्नुस्। यो भाइबहिनीसँग माग्ने होइन,’ मन्त्री श्रेष्ठले भने।
वैदेशिक रोजगारीमा जाने युवाले भोग्नुपरेको समस्याबारे थप छानबिन हुने र भविश्यमा यसता दुःख भोग्न नपर्ने वातावरण निर्माण गर्ने मन्त्री श्रेष्ठले आवश्वासन दिए।
‘भाइहरूले अहिलेसम्म जति टेन्सन लिनुभयो, जति टर्चर लिनुभयो त्यसका लागि सरी। मन्त्रालयको हेड त म हो। एउटा खरिदार, कर्मचारी जसले गल्ती गरे पनि त्यसको जिम्मेवारी त मैले लिनुपर्यो । म फेरि जिम्मेवारीबाट पन्छिने मन्त्री होइन। भाइहरू कोही ४ दिन, कोही ५ दिन, कोही ७ दिन बसेको छ। त्यो हिसाबले क–कसको लिनुभएको छ फिर्ता गर्नुस्’, मन्त्री श्रेष्ठले भने, ‘उहाँहरू उड्ने बेलामा म एयरपोर्ट आउँछु त्यहाँ एक जना भाइले कम्प्लेन गर्यो भने तपाईँलाई सिधै थुन्छु है म फेरि। क्लियर हुनुस् है त।’
पीडित युवा शंकर नेपालले होटल सञ्चालकले जर्बजस्ती बढी पैसा असुलेपछि मन्त्रीसम्म सूचना पुर्याएको उल्लेख गर्दै सामान्य नागरिकले दिएको सानो सूचनाको आधारमा मन्त्री आफैं आएर समस्या सल्ट्याइदिएकोमा खुशी व्यक्त गरे।
भाषा परीक्षा पास गरेका युवाहरू बुधवार साँझ कोरिया प्रस्थान गर्दैछन्।
-1746009348.jpg)
