काठमाडौंको बाफलमा गाडीको ठक्करबाट मोटरसाइकल चालकको मृत्यु भएको छ।
बुधबार दिउँसो बाफलमा टाटा योद्धा गाडीले मोटरसाइकललाई ठक्कर दिएको प्रहरीले जनाएको छ। ठक्कर दिँदा मोटरसाइकल चालकको मृत्यु भएको हो।
कलंकीबाट स्वयम्भू जाँदै गरेको बा १७ च ४९०३ नम्बरको गाडीले विपरीत दिशाबाट आइरहेको प्रदेश नम्बर २-०२८ प ७७२१ नम्बरको मोटरसाइकललाई ठक्कर दिएको हो।
ठक्करबाट मोटरसाइकल चालक चन्द्रागिरि नगरपालिका-२ का किशोर सुवेदी घाइते भएका थिए। उनको उपचारको लागि मनमोहन मेमोरियल अस्पताल लगिएको थियो। त्यहाँ उपचारको क्रममा उनको मृत्यु भएको प्रहरी स्रोतले जनाएको छ।
यस्तै, गाडीका चालक भने दुर्घटनापछि फरार छन्। फरार रहेका चालकलाई महानगरीय प्रहरी वृत्त कालिमाटी र स्वयम्भूको टोलीले खोजी गरिरहेको बताएको छ।
