सुर्खेतको वीरेन्द्रनगर नगरपालिका आजदेखि कोभिड विरुद्धको पूर्ण खोपयुक्त नगरपालिका बनेको छ।
बिहिबार ११ बजे औपचारिक कार्यक्रम आयोजना गरी कोभिडविरुद्धको पूर्ण खोपयुक्त नगरपालिका भएको घोषणा गर्न लागिएको छ।
नगरपालिकाको कोभिड खोप लगाउन लक्षित जनसंख्या भन्दा बढीलाई पूर्ण खोप लगाईसकेपछि आजदेखि पूर्ण खोपयुक्त घोषणा गर्न लागिएको नगरपालिकाका जनस्वास्थ्य निरीक्षक भूपेन्द्रदेव गिरीले जानकारी दिए।
गिरीका अनुसार नगरपालिकाभित्र ९९ हजार ९०५ जनालाई कोभिडविरुद्धको खोप लगाउने लक्ष्य थियो। तर चैत २३ गतेसम्म १ लाख १८ हजार ९४६ जनालाई कोभिडको पूर्ण खोप लगाईसकिएको छ।
यो लक्षित संख्याको १९ प्रतिशत बढी हो। कोभिडको पूर्ण खोप लगाउनेमा पुरूषभन्दा महिला धेरै रहेको गिरीले जानकारी दिए।
वीरेन्द्रनगर नगरपालिका जिल्लाको कोभिडविरुद्धको पूर्ण खोपयुक्त पहिलो स्थानीय तह हो।
पूर्ण खोपयुक्त नगरपालिका घोषणा गर्ने लक्ष्यका साथ स्वयम्सेविका र स्वास्थ्यकर्मी परिचालन गरी सर्वेक्षणसमेत गरिएको नगरपालिकाका जनस्वास्थ्य अधिकृत पर्शुराम खड्काले बताए।
‘लक्षित जनसंख्यालाई खोप लगाईसकेपछि पनि हामीले सबै वडाका टोलहरुमा स्वास्थ्य स्वयमसेविका परिचालन गरी खोप लगाउन बाँकी मानिसको तथ्याङ्क लियौं र उहाँहरुलाई बोलाएर खोप लगायौं,’ खड्काले सेतोपाटीसँग भने, ‘त्यसपछि पनि स्वस्थ्यकर्मी नै पठाएर पूर्ण खोप लगाए/नलगाएको सर्वेक्षण गर्ने काम गरेका थियौं।’
वीरेन्द्रनगर नगरपालिकामा नगर अस्पतालसहित १९ वटा स्वास्थ्य संस्था छन्। ती सबै स्वास्थ्य संस्थामा खोप अभियान नियमित चलिरहेको उनले जानकारी दिए।
वीरेन्द्रनगरका स्थानीय र यहाँ बाहिरबाट आएर बसोबास गर्नेलाई समेत पूर्ण खोप लगाईसकेपछि कोभिडविरुद्धको पूर्ण खोपयुक्त नगरपालिका घोषणा गर्न लागिएको उपमेयर मोहनमाया ढकालले बताईन्।
‘जनस्वास्थ्यका हिसाबले हामीले यसलाई उपलब्धिका रूपमा हेरेका छौं, खोप अभियान अहिले पनि जारी नै छ,’ उपमेयर ढकालले भनिन्।
