बागलुङमा गत असोज २९ गते राति ४२ वर्षीया फूलमाया बोटे (माझी) मृतावस्थामा फेला परिन्। उनी बागलुङ–पोखरा राजमार्गअन्तर्गत बागलुङ नगरपालिका–१ मा पर्ने गणेशघुम्ती माथि मृत फेला परेकी थिइन्। परिवारले उनलाई भेट्दा घाँटीमा सल बेरिएको थियो। हतारहतार परिवारले अस्पताल पुर्यायो तर उनको प्राण थिएन।
सधैं समयमै घरमा आउने फूलमाया त्यो दिन समयमा घर नफर्किएपछि परिवारले खोजी थालेको थियो। मजदुरी गरेर खाने फुलमाया सधैं साँझ साढे ५ बजे घर पुग्थिन्। ढिला भए फोन आउँथ्यो तर त्यो दिन घर पुग्ने समयमा उनको मोबाइल बन्द भयो। त्यसपछि खोजी थालेको परिवारले उनी सधैं हिँड्ने गरेको बाटोमा शव भेट्टायो। शव अस्पताल पुर्याएपछि परिवारले प्रहरीलाई खबर गरेको थियो। मृतकको शव अस्पतालमै भए पनि प्रहरीले तत्कालै घटनास्थल सिल गर्यो।
जिल्ला प्रहरी कार्यालय बागलुङबाट प्रहरी निरीक्षक राजाराम खड्का नेतृत्वको टोली घटनास्थल पुग्यो। अस्पतालमा शव हेरेर घटनास्थल पुगेको प्रहरीले हत्याको आशंका गर्यो र सुरू भयो अनुसन्धान। गत असोज २९ गते प्रहरी नायब उपरीक्षक गंगाबहादुर थापा नेतृत्वमा पोखराबाट विशेषज्ञ टोलीसहितले अनुसन्धान थाल्यो।
'उहाँहरूले अस्पताल पुर्याएपछि खबर गरेको भए पनि हामीले तत्कालै घटनास्थल सिल गर्यौं र खोजी सुरू भयो,' थापा भन्छन्, 'मृतक भेटिएको ठाउँभन्दा एक सय मिटर टाढाको दूरीमा पाँच सयभन्दा बढी मान्छेको भीड थियो। हत्यामा संलग्नको खोजी चुनौतीपूर्ण थियो।'
बांगेचौर खेलमैदान नजिकै नवौं राष्ट्रिय खेलकुदअन्तर्गत आइटिएफ तेक्वान्दो खेल भइरहेको थियो। तर बांगेचौरदेखि बागलुङ पोखरा सडकसम्मको पदमार्गको बीचमा फूलमायाको हत्या भएको थियो। प्रहरीका अनुसार हत्या र लुटपाट साँझ ५ देखि ५ः५२ मा भएको हो। एक साता लामो अनुसन्धानपश्चात् प्रहरीले अभियुक्तलाई पक्राउ गरेको छ।
घटनास्थलको बाटो भएर हिँडेका मानिसहरू, धौलागिरि बहिरा आवासीय माविको सिसिटिभी र अनुसन्धानका अन्य विधिहरूले प्रहरीलाई सघाए।
'फूलमायाको हत्या हुनुपूर्व सोही बाटोमा हिँडेकाहरूलाई पहिला पहिचान गर्यौं। सोधीखोजीमा उनीहरूले बाटोमा दाह्रीवाला हिँडेको बताएपछि हाम्रो अनुसन्धान दाह्रीमा केन्द्रित भयो,' थापाले भने, 'अन्ततः दारी पालेकै प्रकाश योगी पक्राउ परे।'
प्रहरीले बागलुङ नगरपालिका–१ माझीबस्तीकै मृतकका छिमेकी २६ वर्षीय प्रकाश योगीलाई हत्या आरोपमा पक्राउ गरेको छ।
'प्रविधिको प्रयोगले बाटो वरपरको परिवेश नियाल्यौं। दाह्री पालेका केहीलाई निगरानीमा राख्यौं। अभियुक्त घटनास्थलभन्दा केही माथि लामो समय बसेको, नमिल्दा हर्कत गरेको देखेपछि शंका गरेका थियौं,' प्रहरी उपरीक्षक दयानिधि ज्ञवाली भन्छन्, 'अरू हुलिया खोज्दा फेला परेका प्रकाश नै हत्यामा संलग्न भएको निष्कर्षमा प्रहरी पुगेको छ।'
अभियुक्तले प्रहरीलाई दिएको बयानअनुसार व्यक्तिगत रिसइवी, आर्थिक अभाव र मदिरापानले लठ्ठिएका कारण हत्या गरेको स्वीकार गरेका छन्।
बागलुङ बजारमा मजदुरी गरेर फर्किएकी फूलमायाको बांगेचौरमा गौंडो (साँघुरो बाटो) कुरेर पछाडि लागेर केही तल पुगेपछि हत्या गरेको उनले स्वीकार गरेको ज्ञवालीले बताए।
अभियुक्त पनि मजदुरी गरेर छाक टार्ने परिवारकै सदस्य हुन्।
'उनले पहिले फूलमायाकै सल घाँटीमा बेरेको छन्। हत्यापछि गहना लुछ्ने, मोबाइल अफ गर्ने र करणी गर्ने काम गरेको स्वीकार गरेको छन्,' ज्ञवालीले भने, 'आर्थिक अवस्थाकै कारण हत्यामा संलग्न भएको हुनुपर्छ, मदिरा र रिसइवीले त्यसमा सघायो।'
प्रहरीसँगको बयानमा अभियुक्तले ३० हजार ऋण तिर्न बाँकी रहेको र उपाय केही नभएकाले गहना लुट्न हत्या गरेको बताएका छन्। छिमेकी भएकाले एउटै धाराको पानी प्रयोग गर्ने, एक वर्षदेखि पानीको महसुल तिर्न नसकेको भन्दै फूलमायाले अभद्र व्यवहार गर्ने गरेको पनि उनले प्रहरीलाई बताएका छन्।
प्रकाशले फूलमायाले कानमा लगाएका सुनका मुन्द्रा लुटेका थिए। ती मुन्द्रा भने प्रहरीले भेटाएको छैन। हत्यामा संलग्न भएको समयमा अभियुक्तले लगाएका कपडा, चप्पल लगायतका प्रमाणहरू जुटेको ज्ञवालीले बताए।
मृतक फूलमायाका स–साना तीन छोराछोरी र श्रीमान छन्। अभियुक्त प्रकाशको घरमा बाबुआमा मात्रै छन्। प्रकाशका विरूद्धमा ज्यान मुद्दा दर्ता गरेर जिल्ला अदालत बागलुङबाट १० दिनको म्याद थप गरी अनुसन्धान भइरहेको प्रहरीले जनाएको छ।
(रासस)
