यौनिक तथा लैंगिक अल्पसंख्यक समुदायका व्यक्तिहरूले होमोफोबिया, बाइफोबिया र ट्रान्सफोबिया विरूद्ध अन्तर्राष्ट्रिय दिवस मनाएका छन्।
दिवसको अवसरमा मितिनी नेपालले 'सधै संगैः विविधतामा एकता' नामक पुस्तक विमोचन गरेको थियो। साथै उमेर विभेदले नेपालका यौनिक तथा लैंगिक अल्पसंख्यक समुदायका ज्येष्ठ नागरिकहरूमा पारेको प्रभावबारे अनुसन्धान गरेको तथ्यपत्र पनि सार्वजनिक गरिएको छ।
समुदायका सय जना ज्येष्ठ नागरिकमा गरिएको सर्वेक्षणको आधारमा तयार गरिएको उक्त तथ्य पत्र, महिला, बालबालिका तथा ज्येष्ठ नागरिक मन्त्रालयका सुरेन्द्र राज आचार्यको प्रमुख आतिथ्यमा सार्वजनिक गरेको थियो। तथ्य पत्रमा समुदायको आठजना व्यक्तिबारे उल्लेख छ।
मन्त्री सुरेन्द्रराज आचार्यले समुदायको हक, अधिकारको लागि काम गर्ने बताए। आचार्यले समुदायको लागि थप कामसँगै बजेट विनियोजनमा पनि साथ-सहयोग गर्ने बताए। साथै मितिनी नेपालले समुदायको एक जोडी र एक परिवारलाई सम्मान गरेको थियो। मधेस समुदायका बुलन सदा र रेम्नीदेवी सदा अनि मकवानपुरकी सन्ध्या लोप्चनकी आमा बिनमाया लोप्चनलाई सम्मान गरेको हो।
फरक यौनिकता र लैंगिकताकै कारण यो समुदायले भोग्दै आइरहेको असमानता, हिंसा, चुनौती, कष्टकर भोगाई र कठिन परिस्थितिप्रति सरोकारवालाको ध्यानाकर्षण गर्न उक्त दिवस मनाउने मितिनी नेपालको अध्यक्ष लक्ष्मी घलानले बताइन्।
सन् १९९० मे १७ मा विश्व स्वास्थ्य संगठनले समलैंगिकतालाई मानसिक रोगको सुचीबाट हटाई समलैंगिकता हुनु प्राकृतिक प्रक्रिय भन्दै घोषणा गरेको थियो। सोही दिनको स्मरण गर्दै समुदायले उक्त दिवस हरेक वर्षको मे १७ मा विश्वव्यापी रूपमा मनाउँदै आएका छन्।
--1715160207.JPG)
