स्पेनिस ला लिगामा बार्सिलोना अर्को खेलमा बराबरीमा रोकिएको छ।
बार्सिलोना बिहीबार राति भएको खेलमा काडिजसँग गोलरहित बराबरीमा रोकिएको हो।
अन्तिम २५ मिनेट बार्सिलोनाले १० खेलाडीमा खेल्नु परेको थियो। फ्रान्की डे जोङ ६५ मिनेटमा दोस्रो पहेँलो कार्ड पाउँदै मैदान छाड्न बाध्य भएका थिए।
यस्तै दोस्रो हाफको अन्त्यमा प्रशिक्षक रोनाल्डो कोम्यानलाई आक्रमक भएको भन्दै रेफ्रीले कार्ड देखाएका थिए।
बार्सिलोनाले सिजनमा पाँच खेल खेल्दा तीन खेलमा बराबरी खेलिसकेको छ। दुई जित निकालेको बार्सिलोना ९ अंकसहित अंक तालिकाको सातौं स्थानमा छ।
खेलमा बार्सिलोनाका डिपाए गोल गर्ने अवसरबाट चुके। उनको प्रहार आउट भएको थियो।
बार्सिलोनाका गोलकिपर मार्क आन्द्रेले विपक्षी टिमको आक्रमणलाई विफल पार्दै टिमको संकट टारेका थिए। काडिजका अल्भारो नेग्रेडो, सल्भी सान्चेज र एन्थोनी लोजानोको प्रहारलाई बार्सिलोनाका गोलकिपरले विफल पारेका हुन्।
डे जोङलाई पहेँलो कार्ड दिएपछि आक्रमक देखिएका प्रशिक्षक कोम्यान दोस्रो हाफको इन्जुरी टाइममा सर्जियो बुस्केटलाई पनि पहेँलो कार्ड देखिएपछि झनै रिसाएका थिए। जसका कारण कोम्यानलाई पनि रेफ्रीले कार्ड देखाउँदै बाहिर जान निर्देशन दिएका थिए।