एएफसी एसियन कप छनोटअन्तर्गत श्रीलंकाविरूद्ध खेल्ने नेपाली महिला टोलीको प्लेइङ-११ सार्वजनिक गरिएको छ।
उज्वेकिस्तानमा जारी छनोटमा नेपाल र श्रीलंकाबीच साँझ ६ बजे खेल सुरु हुनेछ।
खेलका लागि नेपाली टोलीमा एक परिवर्तन गरिएको छ। सरु लिम्बूको स्थानमा प्रिति राईले पहिलो रोजाइमा खेल्ने भएकी छिन्।
श्रीलंकाविरूद्ध नेपाली टोली
गोलकिपर : अन्जना रानामगर
डिफेन्डर : समिक्षा घिमिरे, गीता राना, निशा थोकर
मिडफिल्डर : रेनुका नगरकोटे, प्रिति राई, सरस्वती हमाल, सविता राना, अनिता बस्नेत
फरवार्ड : सावित्रा भण्डारी (कप्तान), रश्मीकुमारी घिसिङ
छनोटमा यसअघि नेपालले पहिलो खेलमा लाओससँग खेलेको थियो। सावित्रा भण्डारी साम्बाले पहिले पटक कप्तानी गरेको सो खेलमा नेपालले लाओसलाई ९-० गोलले पराजित गरेको थियो।
नेपालका लागि कप्तान साम्बाले पाँच गोल गरेकी थिइन्। यता पहिलो खेलमा श्रीलंकाले भने आयोजक उज्वेकिस्तानसँग १०-० गोललेको हार ब्यहोरेको थियो।
सन् २०१० यता नेपाल र श्रीलंकाबीच ८ खेल भएका छन्। आठै खेलमा नेपाल विजयी भएको छ। आठ खेलमा नेपालले श्रीलंकाविरूद्ध ३० गोल गर्दा अहिलेसम्म गोल खान परेको छैन।
नेपालका लागि कमजोर प्रतिद्वन्द्वी श्रीलंकालाई नेपालले गत वर्षको साफ च्याम्पियनसिपमा ६-० गोलले हराएको थियो।
समूहको शीर्ष टोली मात्र अर्को वर्ष अस्ट्रेलियामा हुने एसियन कपमा पुग्नेछ। त्यसैले अन्तिम खेलमा आयोजक उज्वेकिस्तानसँग भिड्नुअघि नेपाल श्रीलंकामाथि सानदार जित निकाल्न चाहान्छ।
-1746009348.jpg)
