सहिद स्मारक ए डिभिजन लिगमा साविक विजेता मछिन्द्र फुटबल क्लब र उपविजेता त्रिभुवन आर्मी फुटबल क्लबले बराबरी खेलेका छन्।
सोमबार दशरथ रंगशालामा भएको दोस्रो चरणको अन्तिम खेलमा मछिन्द्र र आर्मीले गोलरहित बराबरी खेल्दै अंक बाँडेका हुन्।
गत संस्करणको अन्तिम खेलमा यी दुई क्लबबीच भिडन्त भएको थियो। फाइनल सरहको सो खेलमा मछिन्द्र विजयी हुँदै पहिलो पटक उपाधि जितेको थियो। आर्मीले भने उपविजेतामै चित्त बुझाएको थियो।
सोमबार दशरथ रंगशालामा पहिलो हाफको तुलनामा दोस्रो हाफमा दुवै टिमले अवसर सिर्जन गर्न सकेनन्। मध्यभागमा बल खेलाए पनि विपक्षीको क्षेत्रमा दुवै टिम चुकेका थिए।
त्यसअघि खेलको १० मिनेटमा मछिन्द्रका ओमोलाजा करिमको फ्रिकिङ थोरैले बाहिरिएको थियो। २५ मिनेटमा सुनील बल प्राप्त अवसर चुके। उनले सिक्स यार्ड बक्समा हानेको प्रहारलाई आर्मीका डिफेन्डरले क्लियर गरेका थिए।
यसअघि पहिलो खेलमा साविक विजेता मछिन्द्रले न्युरोड टिम (एनआरटी) लाई २-१ गोलले पराजित गरेको थियो।
आर्मी भने विभागीय डर्बीमा नेपाल पुलिस क्लबसँग १-१ गोलको बराबरीमा रोकिएको थियो।