यसरी हार्‍यो नेपाल ताजकिस्तानसँग (तस्बिर र भिडियो)

नारायण महर्जन

काठमाडौं, भदौ २०

नेपाल एएफसी एसिया कप–२०१९ को छनोटमा ताजकिस्तानसँग घरेलु मैदानमै २–१ ले पराजित भएको छ। सातदोबाटोस्थित एन्फा मैदानमा भएको खेलमा अतिरिक्त खेलाडीका रुपमा प्रवेश गरेका विमल घर्तिमगरले ९ महिनापछि अन्तर्राष्ट्रिय गोल गरे पनि नेपाललाई पराजयबाट जोगाउन सकेनन्।

पहिलो हाफमा फितलो प्रदर्शन गरेको नेपालले २ गोल खायो। ताजकिस्तानले २६ र ३० मिनेटमा लगातार गोल गरेपछि पहिलो हाफमा नेपाल २-०ले पछि पर्‍यो।

ताजकिस्तानका लागि डिजालिलोभ मेनुचेरले कर्नरको सदूपयोग गर्दै पहिलो गोल गरे। उनले ६ यार्ड भित्रबाट नेपाली डिफेन्डरको फितलो उपस्थितिमा हेडिङ गोल गरेका थिए।

दोस्रो गोल भ्यासिद दिलसुदले गरे। नेपालले ३९ मिनेटसम्म विमललाई बेञ्चमा राखेको थियो। तर, अग्रपंक्ति फितलो भएपछि जापानी प्रशिक्षक कोजुले नवयुग श्रेष्ठको स्थानमा विमललाई मैदानमा प्रवेश गराएका थिए।

नेपालले पहिलो हाफको तुलनामा दोस्रो हाफमा सुधारिएको प्रदर्शन गर्यो। अन्तर्राष्ट्रिय प्रतियोगितामा डेब्यु गरेका जर्जप्रिन्स कार्कीलाई पनि दोस्रो हाफमा मैदानमा प्रवेश गराएपछि नेपालले आक्रमणलाई झन तीव्र बनायो। कार्की विशाल राईलाई विस्थापन गर्दै ६३ मिनेटमा राष्ट्रिय टोलीबाट डेब्यु गरेका हुन्।

प्रतियोगितामा नेपालले केही गोल गर्ने राम्रा मौकासमेत खेर फालेको थियो।

हेर्नुहोस् यसरी खेल्ने नेपालले ताजकिस्तानसँग तस्बिरमा