काठमाडौं अन्तर्राष्ट्रिय पर्वतीय चलचित्र महोत्सव (किम्फ) को २३ औं संस्करण मे २७ देखि ३१ (जेठ १३ देखि १७ गते) सम्म हुने भएको छ।
काठमाडौंको ठमेलस्थित क्यूएफएक्स छायाँ सेन्टरमा महोत्सव आयोजना हुने भएको हो।
महोत्सवमा २९ देशका ५० भन्दा बढी फिचर, वृत्तचित्र, छोटा तथा साहसिक फिल्महरू प्रदर्शन गरिने सोमबार काठमाडौंमा आयोजित कार्यक्रमकामा जानकारी दिइयो।
नेपाल पानोरमा खण्डअन्तर्गत नेपाली समाज र समकालीन जीवनलाई उजागर गर्ने स्थानीय फिल्महरू पनि समावेश गरिनेछन्।
महोत्सव निर्देशक राम्यता लिम्बुका अनुसार यस वर्षको कार्यक्रमले दर्शकलाई मनोरञ्जनसंगै सामाजिक विषयमा गहिरो संवादका लागि प्रेरित गर्ने उद्देश्य राखेको छ।
उनले भनिन्–'यस वर्षको फिल्म तथा कार्यक्रमहरूको सूचीले दर्शकलाई मनोरञ्जन दिनुका साथै नेपाली समाजलाई असर गर्ने समसामयिक विषयमा गम्भीर संवादका लागि प्रेरित गर्नेछ भन्ने हाम्रो विश्वास छ।'
उद्घाटन समारोह भारतकी निर्देशक त्रिवेणी रार्ई निर्देशित पुरस्कारप्राप्त फिल्म 'सेप अफ मोमो' (छोरा जस्तै) को नेपाल प्रिमियरबाट हुनेछ, जसमा सहर छोडेर गाउँ फर्किएकी पात्रको आत्मपहिचान र परम्पराबीचको द्वन्द्व देखाइएको छ।
नेपाल र स्विट्जरल्याण्डबीचको कूटनीतिक सम्बन्धको ७० औं वर्षगाँठको अवसरमा किम्फले 'अल्पाइन अलायन्सेसः न्यु वेभ अफ नेपाली सिनेमा' शीर्षकमा स्वीस फिल्म ल्याब तथा महोत्सवमा सहभागी भइसकेका नेपाली फिल्मकर्मीसँग विशेष संवाद कार्यक्रम आयोजना गर्नेछ। त्यस्तै, यस वर्ष 'ह्वाट्स इन अ स्टोरी – सिनेमा एन्ड सेन्सरशिप' शीर्षकमा प्यानल छलफल पनि आयोजना गरिनेछ।
नेपाल–जापान कूटनीतिक सम्बन्धको ७० वर्ष पूरा भएको अवसरमा जापानी निर्देशक साकामोटो जुन्जी निर्देशित 'क्लाइम्बिङ फर लाइफ' विशेष प्रदर्शन गरिनेछ। यो फिल्म सगरमाथा आरोहण गर्ने पहिलो महिला जुनको ताबेईको जीवनमा आधारित छ।
महोत्सवमा काठमाडौं डक ल्याबको दोस्रो संस्करण, छोटा फिक्सन ल्याब, स्क्रिप्ट पिचिङ फोरम तथा युवा केन्द्रित 'आशाः ड्रीम्स इन मोसन' जस्ता कार्यक्रम पनि समावेश छन्।
अन्तर्राष्ट्रिय निर्णायक मण्डलमा विभिन्न देशका फिल्म विशेषज्ञहरू रहनेछन् भने नेपाल पानोरमा निर्णायक मण्डलमा नेपाली फिल्मकर्मी र समीक्षक सहभागी हुनेछन्।
अन्तर्राष्ट्रिय निर्णायक मण्डलमा भारतकी अन्तर्राष्ट्रिय फिल्म प्रोग्रामर दीप्ति डी’कुन्हा, थाइल्याण्ड फिल्म अभिलेखालयकी निर्देशक चलिदा उअबुमरुङ्जित, नेपालका लेखक तथा कवि कुमार नगरकोटी तथा इटालीस्थित चेर्भिनो सिनेमाउन्टेन फेस्टिभलका निर्देशक लुका बिच रहेका छन्।
निर्णायक मण्डलले उत्कृष्ट फिचर फिक्सन (५ छनोट), फिचर वृत्तचित्र (११ छनोट), छोटो फिक्सन (७ छनोट) र छोटो वृत्तचित्र (१० छनोट) विधामा पुरस्कार प्रदान गर्नेछ। नेपाल पानोरमा निर्णायक मण्डलमा लुसी डे बारोस, फिल्म निर्देशक नवीन चौहान तथा फिल्म पत्रकार एवं समालोचक रीना मोक्तान रहेका छन्। उनीहरूले उत्कृष्ट वृत्तचित्र (५ छनोट) र उत्कृष्ट फिक्सन चलचित्र (९ छनोट) चयन गर्नेछन्।
अन्तर्राष्ट्रिय विधाका विजेतालाई १,००० देखि १,५०० अमेरिकी डलरसम्म तथा नेपाल पानोरमाका विजेतालाई जनही १ लाख रूपैयाँ प्रदान गरिनेछ। फिम्फ दर्शक पुरस्कार पनि १ लाख रूपैयाँ रहेको छ।
सर्वसाधारणका लागि टिकट शुल्क १५० र विद्यार्थीका लागि १०० रूपैयाँ निर्धारण गरिएको छ।
महोत्सव किम्फ फाउन्डेसनद्वारा आयोजना गरिन्छ।
