जनगणनामा खटिएकी गणक झापा भद्रपुर नगरपालिका–६ की लक्ष्मी राजवंशी धान खेतमै गएर जनगणनाको फाराम भरिरहेको भेटिइन्।
खेतमा धान काटिरहेकी पुष्पा रिमालको घरमा पुग्दा उनी घरमा नभेटिएपछि नजिकैको खेतमै पुगेर राजवंशीले जनगणनाको फाराम भरिन्। पहिलो चरणको गणनामा नाम छुटेकी भद्रपुर–६ की आस्मा खातुनको विवरणसमेत राजवंशीले सोही बेला टिपिन्।
'घरमा मान्छे नभेटिएपछि सोधी खोजी गरेर उहाँहरू जहाँ हुनुहुन्छ, त्यहीँ गएर फाराम भर्ने गरेकी छु', उनले भनिन्,'कोही नछुट्ने गरी काम गरिरहेका छौं।'
गणनाका लागि जाँदा केही समस्या आउने गरेको उनको भनाइ छ।
'केहीले उमेर भन्न मान्दैनन्, केहीले अन्दाजी यति उति लेखिदिनु भन्छन्', उनले भनिन्, 'डेरामा बस्ने मान्छे घरमा भेटिँदैनन्, मोबाइल नम्बर पनि घरबेटीसँग माग्दा नपाइएको अवस्था छ।'
बिर्तामोड नगरपालिकामा घरभाडामा बस्ने मानिसको संख्या धेरै छ।
इलाम, ताप्लेजुङ, पाँचथर, मोरङ, सुनसरी लगायतका जिल्लासँगै भारतबाट व्यवसाय-मजदूरी गरेर बस्नको संख्या धेरै छ।
जनगणनामा खटिएका बिर्तामोड-४ का नवेश गुरूङले एउटै घरमा पाँच/छ परिवार घरभाडामा बस्दै आएको पाइएको बताए।
'कर उठाउन, भाडा बढाउन, चुनावका लागि विवरण लिन आएको भन्ने मानिसमा भ्रम रहेको पाइयो', बिर्तामोड-५ मा गणकका लागि खटिएका उनले भने, 'धेरैले विवरण दिन अन्काउँछन्, धेरैलाई ‘कन्भिन्स’ गर्दा मात्र विवरण दिने गरेका छन्।'
उनले मानिसको बुझाइ गलत भएकाले केही समस्या भएको बताए।
राजवंशी र गुरूङजस्तै जिल्लामा हाल एक हजार १८७ जना गणक जनगणनामा खटिएका छन्। उनीहरू घरदैलोसँगै खेतबारी र कार्यस्थलमै पुगेर विवरण लिइरहेका छन्।
जनगणनाका लागि झापामा दुई वटा कार्यालय (बिरिङ नदी पश्चिम दमक र बिरिङ नदी पूर्व भद्रपुर) स्थापना गरिएको छ। यसअघि गरिएको प्रारम्भिक सर्वेक्षणमा झापामा दुई लाख सात हजार ५०० परिवार र करिब १० लाख जनसंख्या रहेको तथ्यांक छ।
