निष्क्रियमा वर्गीकरण भएका कर्जाको ६ महिनासम्म ब्याज र किस्ता नियमित हुन थालेमा यस्तो कर्जालाई असल वर्गमा राख्न सकिने भएको छ।
तर, पुनर्संरचना गरिएका वा पुनर्तालिकीकरण गरिएका कर्जामा यस्तो व्यवस्था लागु हुने छैन।
हाल यो व्यवस्था थिएन। असल वर्गमा रहेका कर्जाको लागि १.३ प्रतिशत कर्जा नोक्सानी व्यवस्थामा रकम राख्नु पर्छ।
निष्क्रिय कर्जामा २५ देखि शत प्रतिशतसम्म रकम राख्नु पर्छ। निष्क्रिय कर्जा अन्तर्गत पनि कमसल, शंकास्पद र खराब कर्जा भनेर छुट्याइँदै आइएको छ।
निष्क्रिय अन्तर्गतका शीर्षकमै पनि स्तरोन्नति गर्न सकिने भएको छ। अब स्तरोन्नति हुन सकिने मापदण्ड पूरा भएको ६ महिनामा यसरी कर्जाको यही समूहभित्र वर्गीकरण परिवर्तन हुन सक्ने र त्यही अनुसार नोक्सानी व्यवस्था गर्नुपर्ने भएको छ।
अब कुनै व्यक्ति वा संस्था ऋणीले लिएको कुनै एक कर्जा निष्कृय वर्गमा वर्गीकरण भएमा पनि बैंकहरूले बाँकी असल वर्गमा रहेको कर्जालाई कम्तीमा सूक्ष्म निगरानी वर्गमा राख्नु पर्नेछ।
यसले बैंकहरूले जोखिम प्रावधानमा राख्नुपर्ने प्रावधान थप बढ्नेछ। अन्य कर्जामा १.३ प्रतिशत प्रावधान राख्दै आएका बैंकहरूले अब त्यस्तो कर्जामा पनि ५ प्रतिशत प्रावधान रकम राख्नु पर्नेछ। यो व्यवस्था आगामी माघ १ गतेदेखि मात्र लागु हुनेछ।
त्यस्तै, अब यो नियम कुनै समूहभित्रको कुनै एक ऋणीले लिएको कर्जा निष्कृय भएमा समूहमा रहेका अन्य ऋणीहरूको उक्त ऋणीसँगको व्यावसायिक अन्र्तसम्बन्धबाट पर्ने असरको विश्लेषण गरेर बैंकहरूले उक्त ऋणीबाट प्रत्यक्ष रुपमा प्रभावित हुने समूहका अन्य ऋणीहरूलाई समेत सोही निष्कृय वर्गमा वर्गीकरण गर्नु पर्नेछ।
जस्तैः समूहका पाँच ऋणीहरूमध्ये कुनै एक ऋणी कमसल वर्गमा वर्गीकरण भएमा बाँकी रहेका चार ऋणीमध्ये उक्त ऋणीबाट प्रत्यक्ष रुपमा प्रभावित हुने एक ऋणी भएमा सो ऋणी नियमित भएको अवस्थामा समेत कमसल वर्गमा वर्गीकरण गर्नु पर्नेछ।
कमसल वर्गमा वर्गीकरण भएको ऋणीबाट प्रत्यक्ष रुपमा प्रभावित नभएका अन्य तीन ऋणीलाई भने कमसल वर्गमा वर्गीकरण गर्न बाध्य हुने छैन। यो व्यवस्था आगामी माघ १ गतेदेखि मात्र लागु हुनेछ।
-1746009348.jpg)
