३२ वर्षदेखि गोविन्दप्रसाद तिवारीले आफ्ना ग्राहकलाई भेटघाट तासको एउटै स्वाद चखाइरहेका छन्। भेटघाट तासको तीनवटा शाखा छन्।
दुईवटा भरतपुरको सहिद चोक र अदैत चोकमा र एउटा शाखा काठमाडौंको अनामनगरमा छ। यीमध्ये जहाँ खाए पनि तासको स्वाद एउटै छ।
यसको एउटै कारण भनेको तासमा प्रयोग हुने मसला हो।
भेटघाटका जन्मदाता गोविन्दप्रसाद तिवारीले सेतोपाटीसँग भने, ‘तीनवटै शाखामा हामी एउटै मसला प्रयोग गर्छौ। चितवनबाटै मसला तयार भएर काठमाडौं जान्छ।’
तिवारीले तासमा २४ प्रकारका मसला प्रयोग गर्छन्। र मसला पनि उनी आफैं तयार पार्छन्।
अहिले चितवन आसपास र बाहिरबाट आउने मानिसहरु सकेसम्म भेटघाट तास पुग्ने गर्छन्।
३ केजी मासु ल्याएर सानो छाप्रोबाट सुरु गरेको भेटघाटमा अहिले दैनिक ५ वटासम्म खसीको मासु खपत हुन्छ।
तीनवटै शाखामा गरी ५० बढी कामदारले रोजगार पाएका छन्।
तास व्यवसायबाटै तिवारीले आफ्ना तीन सन्तानमध्ये दुईलाई डाक्टर र एकजनालाई एमबीए पढाए। जेठा छोरा महेश तिवारी काठमाडौं अनामनगरमा रहेको शाखा सम्हाल्छन्।
नेपालमा तास पहिलोपल्ट आफूले नै भित्र्याएको गोविन्दप्रसादको दाबी छ। अहिले पाँचतारे होटलहरुको मेनुमा तास देख्दा तिवारी दंग पर्छन्।
भेटघाट तासलाई नेपालको अन्य सहरहरुमा विस्तार गर्ने तिवारीको सोच छ।
‘पोखरा, बुटवल र हेटौंडालाई हामीले सम्भावित ठाउँको रुपमा हेरेका छौं,’ तिवारीले भने।
हेर्नुस् सेतोपाटीका लागि विवेक राई र सीताराम कोइरालाले तयार पारेको भिडिओः
प्रकाशित मिति: शुक्रबार, असोज ३, २०७६, १८:१९:००
.JPG)
