नेपाल आयल निगमले पोखरा क्षेत्रीय अन्तर्राष्ट्रिय विमानस्थल परिसरमा हवाई इन्धन भण्डारण गृह (डिपो) निर्माण कार्य सम्पन्न गरेको छ।
आन्तरिक तथा बाह्य पर्यटकको पोखरा भ्रमणको बढ्दो क्रमलाई मध्यनजर गर्दै उक्त डिपो निर्माण गरिएको हो।
निगमले पहिलो पटक स्वदेशी सीप र पुँजीमा डिपो निर्माण गरेको हवाई इन्धन डिपो निर्माण परियोजना, पोखरा कास्कीका परियोजना प्रमुख प्रदिप कुमार यादवले जानकारी दिए।
'पहिले निगमले परियोजना बनाउँदा वैदेशिक आर्थिक तथा प्राविधिक सहयोगमा बनाउने गरेको थियो,' उनले भने, 'अहिले निगमले ५५ वर्षको इतिहासमै पहिलो पटक स्वदेशी परामर्शदाता, स्वदेशी निर्माण व्यवसायी र आन्तरिक स्रोतबाट डिपो निर्माण गरेको छ।'
उनका अनुसार यो डिपो स्वदेशी प्रविधि, स्वदेशी डिजाइन र ठेकेदारको सहयोगमा निर्माण भएको हो।
परियोजनाको विस्तृत संभाव्यता अध्ययन प्रतिवेदन (डिपिआर) पुल्चोक इन्जिनियरिङ संस्थानले बनाएको हो।
यहाँ प्रति ट्यांकी १२ सय किलोलिटर क्षमताको ३ वटा (कुल ३६ सय किलोलिटर) ठूला भण्डारण गृह निर्माण गरिएको छ।
त्यस्तै, डिपो सुरक्षामा उच्च सतर्कता अपनाउनका लागि १२ सय किलोलिटर क्षमताको अलग्गै पानी ट्यांकी निर्माण गरिएको छ।
उक्त पानी ट्यांकीसँग डिपोको वरिपरि जडान गरिएको फायर फाइटिङ संरचनालाई जोडिएको छ। जसका कारण आगलागीजन्य घटना हुँदा तत्काल न्यूनीकरण गर्न सकिनेछ।
यस डिपोमा फायर फाइटिङ प्रयोजनका लागि २३० हर्स पावर क्षमताको दुई वटा फायर फाइटिङ डिजल पम्प, १५ हर्स पावर क्षमताको एउटा जक्की पम्प र ८ इन्चको पाइप जडान गरिएको छ।
भण्डारण गृहमा रहेको हवाई इन्धन पाइपका सहायताले रिफ्युलमा भर्न तथा ट्यांकरबाट ल्याइएको हवाई इन्धन भण्डारण गृहमा राख्नका लागि आवश्यक मात्रामा प्रोडक्ट पम्पहरू तथा लोडिङ/अनलोडिङमा क्रमशः १ माइक्रोन र ५ माइक्रोनका फिल्टर जडान गरिएको छ।
यहाँ जडान गरिएको स्टोरेज ट्यांक तथा फलामको पाइपहरू अमेरिकन पेट्रोलियम इन्स्टिच्युट (एपिआई) मापदण्डमा आधारित रहेको निगमले जानकारी दिएको छ।
निगमका अनुसार यो परियोजना भ्याट बाहेक ७५ करोड रूपैयाँ लगानीमा बनेको हो।
पोखराको आधुनिक र सुविधा सम्पन्न विमानस्थलबाट उडान तथा अवतरण गर्ने राष्ट्रिय तथा अन्तर्राष्ट्रिय विमानलाई आवश्यक पर्ने हवाई इन्धन उपलब्ध गराउनका लागि विमानस्थल परिसरमै नौ हजार दुई सय १५ वर्गमिटर क्षेत्रफलको जग्गा नागरिक उड्डयन प्राधिकरणसँग लिज सम्झौता गरी निगमले उपयोग गर्दै आएको छ।
सोही जग्गामा अहिले अत्याधुनिक प्रविधि जडित हवाई इन्धन डिपो निर्माण सम्पन्न भएको हो।
२०७७ साल चैत २ गते यहाँ हवाई इन्धन डिपो निर्माणका लागि सार्वजनिक खरिद ऐनअनुसार बोलपत्र आह्वान भएको थियो।
तर, विविध कारणले डेढ वर्षपछि २०७९ साल कात्तिक २९ गते मात्रै बोलपत्र पेस गर्नेमध्ये सार्वजनिक खरिद ऐनको प्रावधानअनुसार तोकिएको योग्यता र न्यूनतम रकम कबोल गर्ने निर्माण व्यवसायीसँग निर्माण कार्य अघि बढाउन सम्झौता भएको थियो।
लगत्तै, २०७९ साल पुस १५ मा नागरिक उड्डयन प्राधिकरणसँग जग्गा भाँडामा लिने विषयमा सम्झौता कार्य सम्पन्न भएको थियो।
त्यसपछि तत्कालीन उद्योग वाणिज्य तथा आपूर्ति मन्त्री रमेश रिजालको उपस्थितिमा आयल निगमका उच्च पदस्थ अधिकारी, सरोकारवाला निकाय र सञ्चारकर्मीको उपस्थितिमा २०८० साल साउन १ गते निर्माण कार्यको शिलान्यास भएको थियो।
शिलान्यास लगत्तै निर्माण कार्यलाई निरन्तर रूपमा तीव्रता दिई तोकिएको समयमै निर्माण सम्पन्न गरिएको हो।
-copy-1745411477.jpg)
-1746009348.jpg)
