‘१०६औँ अन्तर्राष्ट्रिय श्रम सम्मेलन’को एक भागका रूपमा रहेको ‘रोजगारीको विश्व शिखर बैठक’ मा भाग लिन यहाँ आएकी राष्ट्रपति विद्यादेवी भण्डारीसँग बिहीबार अन्तर्राष्ट्रिय श्रम सङ्गठनको कार्यालयमा सङ्गठनका महानिर्देशक गाय राइडरले आफ्नै कार्यकक्षमा भेट गरेका छन्।
उक्त अवसरमा गणतन्त्र माल्टाका राष्ट्रपति मारिया लुइस कलिरो प्रेका तथा गणतन्त्र मरिससका राष्ट्रपति अमिना गुरिफ फकिमको पनि उपस्थिति थियो । उनीहरूबीच दुईपक्षीय विषयमा संक्षिप्त छलफल भयो।
उक्त अवसरमा स्विट्जरल्यान्डका लागि नेपालका राजदूत तथा संयुक्त राष्ट्र सङ्घका लागि स्थायी प्रतिनिधि दीपक धिताल र परराष्ट्र मन्त्रालयका सचिव शङ्करदास वैरागी उपस्थित थिए।
‘आईएलओ’ इतिहासबारे जानकारी
यसैबीच, राष्ट्रपति भण्डारीले बिहीबार नै अन्तर्राष्ट्रिय श्रम सङ्गठनको कार्यालयमा सङ्गठनको इतिहासका बारेमा जानकारी लिइन्।
बिहीबार सङ्गठनको कार्यालयमा आइपुग्दा उनलाई सङ्गठनका व्यवस्थापन तथा सुधारका उपमहानिर्देशक ग्रेग भाइन्सले स्वागत गरेका थिए।
यसैगरी, उनलाई सङ्गठनका सहायक महानिर्देशक तथा एसिया तथा प्रशान्त क्षेत्रका लागि क्षेत्रीय निर्देशक तोमोको निसिमोतो तथा महानिर्देशकको कार्यालयका वरिष्ठ सल्लाहकार सेन्जी लीले पनि स्वागत गरे।
राष्ट्रपति भण्डारीलाई सङ्गठनका बेची रेमोले यसको इतिहासबारेमा जानकारी गराएकी थिइन्। साथै, उनले नेपालको सङ्गठन प्रवेशका दस्तावेज पनि देखाएकी थिइन्।
उक्त अवसरमा स्विट्जरल्यान्डका लागि नेपालका राजदूत तथा संयुक्त राष्ट्रसङ्घका लागि स्थायी प्रतिनिधि दीपक धिताल, परराष्ट्र मन्त्रालयका सचिव शङ्करदास वैरागी, राष्ट्रपतिका स्वकीय सचिव डा विमला पौडेल राई तथा परराष्ट्र मन्त्रालयका प्रवक्ता तथा सहसचिव भरतराज पौडेलको पनि उपस्थिति थियो । रासस
-1746009348.jpg)
