न्युयोर्कस्थित एक पुनरावेदन अदालतले राजनीतिक असाईलम गरेका एक नेपालीले गरेको पुनरावेदन निवेदनलाई अस्वीकार गरिदिएको छ। जुन १६, २०१४ मा आफ्नो राजनीतिक असाईलम् अस्वीकृत भएपछि ती नेपालीले १५ डिसेम्बर २०१६ मा पुनरावेदन गरेका थिए। एक आप्रवासन न्यायाधीशले ती नेपालीको राजनीतिक असाईलमको निवेदनलाई खारेज गर्ने निर्णय गरेपछि आप्रवासन न्यायाधीशको निर्णयमाथि पुनरावेदन गर्न निवेदन गरेको सोत्रले जनाएको छ ।
न्यूयोर्कस्थित पुनरावेदन न्यायालयले दोस्रो सर्किटका लागि मे १६ , २०१७ मा फैसला गर्दै भनेको छ – ‘इमिग्रेशन अपील बोर्ड (बीआईए) को निर्णयको समीक्षाका लागि प्राप्त निवेदनलाई विचार-विमर्श गर्दा, निवेदकको पुनरावेदनको निवेदन अस्वीकृत गरिन्छ।’
आफू नेपाली कांग्रेसक पार्टीको सदस्य भएको र नेपाल फर्कदा राजनीतिक कारणले आफूलाई खतरा भएको जनाई असाईलमको निवेदन दिएका उक्त नेपालीको पुनरावेदन उपरको निर्णयमा नेपालको परिवर्तित राजनीतिले अब निवेदकलाई नेपालमा कुनै खतरा हुन नसक्ने निचोड निकालेको हो।
पर्याप्त प्रमाणका लागि देशमा भएको परिवर्तनको अवस्थाका सन्दर्भमा एजेन्सीले गरेको वास्तविक बिश्लेशण र निष्कर्षलाई समीक्षा गरेको समेत उक्त निर्णयमा जनाईएको छ ।
पुनरावेदनको उक्त निर्णयमा भनिएको छ -देशमा मुख्य परिवर्तन भएको तथ्य सहित एजेन्सीले रिपोर्ट दिएको छ। सन् २०१३ मा भएको निर्वाचन शान्ति पूर्ण रहेको र नेपाली कांग्रेस सबैभन्दा ठूलो पार्टीको रूपमा स्थापित भएको समेत जनाईएको छ।
निर्वाचन ताका मावोवादी पार्टीका तर्फबाट केही घटना भएको स्थानीय समाचार पत्रले जनाए पनि निर्वाचन पूर्व माओवादी पार्टीले नेपाली कांग्रेसका कार्यकर्ता उपर भएको आक्रमणको प्रमाण देखिएन। वास्तवमा, एजेन्सीको बिश्लेषण र पेश भएका प्रमाण का अनुसार नेपाली कांग्रेसका कार्यकर्ताबाट माओवादी पार्टी सदस्यलाई खतरा रहेको देखिएको छ।
मार्च १४, २०१४ मा दुई मावोवादी दलको संयुक्त प्रेस विज्ञप्ति अनुसार नेपाली कांग्रेसले धेरै माओवादी सदस्यलाई गिरफ्तारी गर्दै हिरासतमा लिएको शिकायत गरेको एजेन्सीको खोज रिपोर्टमा उल्लेख भएको जनाईएको छ ।
आफूलाई बिगतको घटनाक्रमले मानसिक तनाव भएकाले मानवीय शरणका लागि आफू योग्य रहेको निवेदन उपर अदालतले दीर्घकालिक शारीरिक या मानसिक प्रभावको कुनै प्रमाण पेश नहुँदा नेपाल फर्कन नसक्ने कुनै आधार नभएको हुँदा मानवतावादी असाईलम खारेज गरिएको पुनरावेदन अदालतको निर्णयमा जनाईएको छ ।
