त्रिभुवन विश्वविद्यालयले कुलपतिसमेत रहेका प्रधानमन्त्री केपी शर्मा ओलीलाई हिँड्न प्लाइउड बिच्छाइएको बताएको छ।
उपकुलपतिको कार्यालय र सरस्वती मन्दिर उद्घाटन गर्ने क्रममा बाटोमा हिलो भएकोले कुलपति हिँड्न सजिलो होस् भनेर प्लाइउड बिच्छाए पनि सञ्चार माध्यमले रातो कार्पेट लेखेर गरिमालाई धमिल्याउन खोजेको त्रिविले दाबी गरेको छ।
त्रिवि रजिष्ट्रार कार्यालयबाट सूचना अधिकारी दीपक शाहीले बिहीबार प्रेस विज्ञप्ति निकालेर प्लाइउडलाई रातो कार्पेट मानि प्रकाशित समाचारप्रति त्रिविको ध्यानाकर्षण भएको उल्लेख गरेका छन्।
‘केही अनलाइन र पत्रपत्रिकामा प्रधानमन्त्रीलाई हिँड्न हिलोमाथि रातो कार्पेट बिच्छाइएको समाचारप्रति त्रिविको ध्यानाकर्षण भएको छ,’ विज्ञप्तिमा भनिएको छ, ‘समाचारले त्रिविको गरिमा धमिल्याउने कार्यप्रति विश्वविद्यालय दु:ख प्रकट गर्छ।’
त्रिविले हुँदै नभएको घटनालाई लिएर अतिरञ्जित गरेकोसमेत दाबी गरेको छ।
बुधबार प्रधानमन्त्री ओली उपकुलपतिको कार्यालय उद्घाटनका लागि हिलोमाथि बिच्छाइएको रातो कार्पेटमा हिँडेको भन्दै आलोचना भइराखेको छ।
यो पनि हेर्नुस् :
प्रधानमन्त्रीलाई हिलोमाथि रातो कार्पेट, त्यसैमा हिँडेर सबैले भने- ह्याप्पी बर्थडे टियू