नेपाली कांग्रेसका वरिष्ठ नेता रामचन्द्र पौडेलले कम्युनिष्टहरुले आफ्नो पुरानो नीति सिद्धान्तलाई क्रमशः बाहिर ल्याउन सुरु गरेको बताएका छन्।
बरिष्ठ नेता पौडेलले कम्युनिष्ट सिद्धान्त बलियो बनाउनका लागि चीनको जस्तो प्रशिक्षण सुरु गर्न लागेको समाचार बाहिर आएको भन्दै यो लोकतन्त्रका लागि खतरा भएको बताए।
गण्डक टोखा प्रजातान्त्रिक समाजद्वारा आयोजित बडा दसैँको शुभकामना आदानप्रदान कार्यक्रममा पौडेलले भने–‘नेपालीलाई अहिले चिनियाँ मोडेलको शासन व्यवस्थाबारे प्रशिक्षण दिनु, सवै अधिकार एकजनामा केन्द्रीत गर्नु कम्युनिष्ट अधिनायकवाद तर्फ उन्मुख हुने संकेत हुन्।’
संविधान कार्यान्वयन गर्ने भन्दा पनि कम्युनिष्टको घोषणापत्र कार्यान्वयन गर्ने प्रयास भइरहेको उनले बताए।
पौडेलले जनता असन्तुष्ट भएपछि आफ्नो सत्ताको नियन्त्रण गर्न नेकपाले कार्यकर्ता पोस्न लागेको बताए। पौडेलले भने– ‘आम जनता असन्तुष्ट छन् तर सरकारलाई कुनै चासो छैन, कम्युनिष्ट पार्टीको सरकार सत्ताको बलमा कार्यकर्ता पोसेर नयाँ वर्ग जन्माउन लागेको छ।
पौडेलले अहिले विचार सिद्धान्तको राजनीति कमजोर हुँदै जात धर्म र भूगोलको राजनीतिले प्रश्रय पाउन लागेको बताए। उनले जात धर्म र भूगोलको नाममा राजनीति ध्रुवीकरणको प्रयास भइरहेको भन्दै चिन्ता व्यक्त गरे।
उनले विपी कोइरालाले देखाएको बाटोका बारेमा आम कांग्रेस कार्यकर्तालाई एकपटक प्रशिक्षित गर्नुपर्ने बेला भएको बताए। विपी कोइरालाले विकास कसरी गर्न सकिन्छ भन्ने मोडेल प्रस्तुत गरेको भन्दै उनले आम कांग्रेस कार्यकर्ताले विपीको विचारमा बहस गर्न सक्ने हुनुपर्ने बताए।
