संस्कृति, पर्यटन तथा नागरिक उड्डयन मन्त्री योगेश भट्टराईले आगामी एक दशक सम्म भ्रमण वर्ष मनाउने सरकारको योजना रहेको बताएका छन्।
जनकपुरमा बुधबार आयोजित पत्रकार भेटघाट कार्यक्रममा मन्त्री भट्टराईले भ्रमण वर्ष २०२० प्रचारप्रसारको थालनी मात्रै भएको बताउदै आगामी एक दशक सम्म भ्रमण वर्ष मनाउने रणनीति रहेको बताए।
उनले विभिन्न ठाउँबाट जनकपुरधामको भ्रमणमा आउने पर्यटकहरुका लागि विशेष तयारी गर्नु पर्ने र उनीहरुलाई आकर्षक स्थललाई विशेष व्यवस्था गर्नुपर्ने बताए। यसका लागि पर्यटकलाई रोक्ने प्रकारको वातावरण बनाउनु पर्ने आवश्यकता रहेको उनले बताए।
‘जनकपुरधाम आउने पर्यटक यहाँको भ्रमण गरेर फर्किने गर्छन्, तिनीहरुलाई रोक्नु पर्ने अवश्यकता छ,' उनले भने, 'यहाँ आउने पर्यटकलाई छिन्मस्ता, गढिमाई, बारा, पर्सा, महोत्तरी लगायत विभिन्न ठाउँमा घुम्ने बनाउनु पर्यो।’ पर्यटकलाई रोकेर मात्रै नहुने बताउदै तिनीहरुलाई यहाँ बस्ने प्रकारको वातावरण बनाउनु पर्ने मन्त्री भट्टराईको भनाइ थियो।
उनले एक प्रदेशलाई अर्को प्रदेशसँगको समन्वय र सहकार्यमा जोड्नुपर्ने समेत बताए। यसका लागि भट्टराइले विभिन्न स्थललाई विभिन्न प्रदेशसँग जोड्ने गरी प्रदेश सर्किट बनाउनु पर्ने आवश्यकता रहेको औल्याए।
त्यस्तै, मन्त्री भट्टराईले मैथिलीका महाकवि विद्यापति मिथिलाका मात्रै नभई सम्पूर्ण देशको महाकवि रहेकोले उनको शालिक नेपालको विभन्न ठाउँमा आफ्नै कार्यकालमा निर्माण गर्ने बताए।
