सरकारका प्रवक्ता गोकुलप्रसाद बाँस्कोटाले मन्त्रिपरिषद् पुनर्गठनमा पैसाको चलखेल नभएको बताएका छन्।
प्रधानमन्त्रीले बुधबार राति नौ मन्त्रीलाई थपी नौ मन्त्रीलाई हटाएर मन्त्रिपरिषद् पुनर्गठन गरेका थिए। त्यसको भोलिपल्ट अर्थात आज बिहान सत्तारूढ नेपाल कम्युनिष्ट पार्टीका प्रदेश नम्बर २ का अध्यक्षसमेत रहेका प्रभु साहले लेनदेनको आधारमा मन्त्रिपरिषद् पुनर्गठन गरेको भन्दै फेसबुक स्टाटस लेखेका थिए।
सोही सन्दर्भमा बिहीबार नियमित पत्रकार सम्मेलनमा पत्रकारले मन्त्रिपरिषद् पुनर्गठनमा पैसाको चलखेल भएको हो भन्ने प्रश्नमा प्रवक्ता बाँस्कोटाले पैसाको चलखेल गरेको भन्ने सस्तो प्रश्न नगर्न आग्रह गरे।
‘पैसाको चलखेल गरेर मन्त्री बन्ने नबन्ने आरोप कसले लगायो थाहा भएन। तपाईंकै मुखबाट सुनौं न कसले आरोप लगाएको हो?’ उनले भने, ‘राजनीति निष्ठा र निरन्तरको सेवा हो। को सत्तापक्षको नेताले पैसाको चलखेल भयो? पवित्र राजनीतिमा सस्तो प्रश्न गर्नु भएन। प्रश्नका लागि प्रश्न नगर्नू,’उनले भने।
प्रकाशित मिति: बिहिबार, मंसिर ५, २०७६, ०५:५१:००
.jpg)
