बुधबार साँझ पूर्वआइजिपी सर्वेन्द्र खनालले समाजवादी पार्टीका सांसद तथा पूर्वस्वास्थ्य राज्यमन्त्री सुरेन्द्र यादवलाई फोन गरे। खनाल र यादवबीच पूरानो चिनजान थियो।
‘कता हुनुहुन्छ मन्त्रीज्यू, म जनकपुर आएको छु एकचोटी भेटम् न,’ खनालले भने।
सांसद यादवका पिएसओलाई सोधेर पूर्वआइजिपी खनालले पहिला नै उनको लोकेसन पत्ता लगाइसकेका थिए।
यादवले हुन्छ भेटम न भनेको केहीबेर खनाल उनी भएको ठाउँ पुगे।
खनालसँगै त्यहाँ अरू दुई जना पनि पुगेका थिए- पूर्वमन्त्री र सांसद प्रधानमन्त्री ओलीका विश्वासपात्र महेश बस्नेत र अर्का सांसद किसान श्रेष्ठ।
यादवले उनीहरूसँग कुरा गरे।
कुराकानीका क्रममा सांसद बस्नेतले यादवलाई भने- प्रधानमन्त्रीज्यूले तपाईंलाई फुल मन्त्री बनाउने, लिएर आउनु भन्नुभएको छ। काठमाडौं जाम, बाँकी कुरा उतै गरौंला।
बस्नेतको कुरा सुनेर यादव दोधारमा परे। उनी बाथरूममा छिरे र आफूले चिनेका नेतालाई आफूलाई काठमाडौं लैजान प्रधानमन्त्रीका मान्छे आएको बताए।
त्यसलगत्तै समाजवादी पार्टीका नेताहरूले सांसद यादवलाई प्रहरीले अपहरण गरेको भन्दै ट्वीट गरेका थिए।
खनाल र बस्नेत सांसद यादवलाई आफ्नै गाडीमा राखेर काठमाडौंतिर लागे।
बाटोमा बस्नेतले सांसद यादवलाई प्रधानमन्त्री केपी शर्मा ओलीसँग फोनमा कुरा गराए।
‘बस्नेतले मलाई फोन दिए। प्रधानमन्त्रीले तपाईं काठमाडौं आउनुस्। तपाईं अब मन्त्री बन्ने हो। बाँकी कुरा टेन्सन नलिनुस् भन्नुभयो,’ यादवलाई उद्धृत गर्दै समाजवादी पार्टीका नेता विश्वदीप पाण्डेले सेतोपाटीसँग भने,‘काठमाडौंमा तपाईंको सबै व्यवस्था भइसकेको छ। भोलि बिहान ८ बजेतिर बालुवाटार आउनुहोला। बाँकी कुरा त्यहीँ गरौंला। अब तपाईंले राम्रो भूमिका खेल्नुपर्छ।’
रातको ३ बजे पूर्वआइजिपीसहितले सांसद यादवलाई होटल मेरियटमा ल्याएर छोडिदिए।
एकजना पिएसओसहित उनलाई त्यही होटलको ७०३ नम्बरको कोठामा राखेर उनीहरू आ-आफ्नो घर गए।
होटलमा पार्टी फुटाउन चाहने समाजवादी पार्टीका अरू पनि सांसद थिए।
राति ३ बजे नै सांसद यादवले समाजवादी पार्टीको प्रचार विभागका उपप्रमुख पाण्डेलाई एमएमएस पठाए-मलाई होटलको कोठा नम्बर ७०३ मा ल्याएर राखेका छन्।
‘होटलमा पुगेर उहाँले मलाई एसएमएस गर्नुभयो। यहाँ अरू १५ कोठा पनि बुक गरिएका छन्। भोलि बिहान तपाईं यतै कतै आइरहनु होला म बाहिर निस्कन्छु,’ पाण्डेले सेतोपाटीसँग भने।
बिहान उठेर पाण्डेले सांसद यादवसँग सम्पर्क गरे। उनीहरूबीच होटलबाहिर भेट्ने सल्लाह भयो।
यादवले बिहान आफ्नो पिएसओलाई ‘तिमी सामान मिलाउँदै गर म एकछिन बाहिर मर्निङ वाक गएर आउँछु’ भनेर निस्किए।
‘त्यहीबेला हामीले उहाँलाई गाडीमा हालेर ल्यायौं,’ पाण्डेले भने,‘उहाँले जनकपुरदेखि यहाँसम्म ल्याउँदाको सबै बेलिविस्तार लगाउनुभयो।’
सांसद यादवलाई अहिले गोप्य र सुरक्षित स्थानमा राखिएको पाण्डेले जानकारी दिए।
सांसद यादव फुत्किएर आएपछि समाजवादी पार्टी फुटाउने प्रधानमन्त्री ओलीको योजना कमजोर भयो। पार्टी फुटाउने पक्षमा ६ जनामात्र सांसद पुगेपछि प्रधानमन्त्रीले पूर्वआइजिपी खनाललाई प्रयोग गरेर सांसद यादवलाई लिन आफ्ना विश्वासपात्र महेश बस्नेतलाई पठाएका थिए।
सांसद यादव फुत्किएपछि समाजवादी पार्टी फुटाउन सहमत भएका अरू कतिपय सांसद पनि हच्किए। अन्तत: समाजवादी पार्टी फुटाउन नेतृत्व गर्न रेणु यादव र महम्मद इस्तियाक राई पनि पछि हटेका छन्।
अपहरणको शैलीमा काठमाडौं ल्याइएका सांसद यादव पेशाले चिकित्सक हुन्। उनी ओली सरकारमा उपेन्द्र यादव स्वास्थ्यमन्त्री हुँदा स्वास्थ्य राज्यमन्त्री थिए।
