प्रमुख प्रतिपक्षी नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओलीलाई यातायात व्यवसायीका समस्या समाधान गर्न आग्रह गरेका छन्।
विभिन्न माग लिएर सभापति देउवालाई ज्ञापनपत्र बुझाउन बुधबार बुढानिलकण्ठ पुगेका यातायात व्यवसायीका कुरा सुनेपछि देउवाले प्रधानमन्त्रीलाई फोन गरेर यातायात व्यवसायीका समस्या सुन्न आग्रह गरेका हुन्।
‘यातायात व्यवसायीहरू सभापतिज्यूलाई ज्ञापनपत्र बुझाउन आउनुभएको थियो। उहाँहरूका कुरा र माग सुनेपछि सभापतिज्यूले प्रधानमन्त्रीज्यूलाई फोन गरेर यातायात व्यवसायीका समस्या सुन्नुस् भन्नुभएको हो,’ सभापति देउवाका सहयोगी भानु देउवाले सेतोपाटीसँग भने।
सभापति देउवाले प्रधानमन्त्रीलाई फोन गरेर यातायात व्यवसायीका समस्या सुन्न छलफल कार्यक्रम राख्न पनि आग्रह गरेका थिए।
जवाफमा प्रधानमन्त्री ओलीले बिहीबार बिहान यातायात व्यवसायीसँग कुराकानी गर्ने बताएको भानु देउवाले जानकारी दिए।
कोरोनाभाइरस महामारीपछि तीन महिनादेखि सार्वजनिक यातायात सञ्चालन हुन सकेको छैन।
सरकारले जिल्लाभित्र सार्वजनिक यातायात सञ्चालन गर्न पाइने भने पनि सरकारले बीमा लगायतका काम गरिदिनुपर्ने भन्दै व्यवसायीले गाडी चलाएका छैनन्।
