योशिहिदी सुगा जापानका नयाँ प्रधानमन्त्री बन्ने भएका छन्।
पूर्वप्रधानमन्त्री सिन्जो आबेका बफादार सहकर्मीका रूपमा काम गरेका सुगा सोमबार भएको सत्तारूढ लिबरल डेमोक्रेटिक पार्टी(एलडिपी) को नेतृत्वको चुनावमा भारी मतले विजयी भएका छन्।
यो जितसँगै यसअघि प्रमुख क्याबिनेट सेक्रेटरी रहेका सुगालाई प्रधानमन्त्री हुने बाटो खुलेको हो।
आबेका आर्थिक तथा विदेशी नीतिलाई अनुशरण गर्ने बताएका ७१ वर्षीय सुगाले ३ सय ७७ मत पाएर जित हात पारेका हुन्।
चुनावमा संसदका सदस्य तथा ४७ लोकल च्याप्टरहरूका ५ सय ३४ प्रतिनिधिले मतदान गरेका थिए।
चुनावमा पूर्वरक्षा मन्त्री शिजेरू इसिबाले ६८ मत पाएका थिए भने पूर्वविदेश मन्त्री फुमियो किसादाले ८९ मत ल्याए।
जापानको तल्लो सदनमा एलडिपीको बहुमत भएको हुँदा बुधबार संसदमा हुने चुनावमा पनि उनी प्रधानमन्त्री निर्वाचित हुने पक्कापक्की भएको हो।
उनले अगस्ट अन्तिम साता स्वास्थ्यका कारण राजीनामा दिएका आबेको बाँकी कार्यकाल सन् २०२१ सेप्टेम्बरसम्म पार्टीका प्रमुखको रूपमा पद सम्हाल्ने छन्।
चुनाव जितेपछि सुगाले आबेलाई धन्यवाद दिएका छन्।
'म अकिताका एक किसानको जेठो छोराको रूपमा जन्मिएको थिएँ,' सुगाले भने,'कुनै ज्ञान वा रगतको नाता नहुँदै, मैले राजनीतिको विश्वमा शून्यबाट प्रवेश गरें र परम्परा र इतिहासका साथ म एलडिपीको प्रमुख बन्न सक्षम भएँ।'
उनले त्यसैमा थपे,'म जापान र यहाँका नागरिकको लागि काम गर्न आफूलाई समर्पित गर्छु।'
उत्तर जापानका स्ट्रबेरी किसानका छोरा सुगाले स्थानीय तहको सदस्यको रूपमा राजनीति सुरू गरेका थिए। सन् २०१२ देखि उनी आबेको क्याबिनेटमा कार्यरत थिए।
प्रकाशित मिति: सोमबार, भदौ २९, २०७७, १८:२२:००
