प्रधानमन्त्री केपी शर्मा ओली ६९ वर्ष पुरा गरि ७० वर्ष टेकेका छन्। ओलीको जन्मदिनमा राष्ट्रिय युवा संघ नेपालले काठमाडौंमा कार्यक्रम गरेर केक काट्यो।
संघको केन्द्रीय कमिटि प्रथम बैठकको अवसरसमेर्त पारेर आयोजित कार्यक्रममा प्रधानमन्त्री ओलीले आफ्नो उमेरबारे पनि केही कुरा राखे।
‘अघि भर्खर केक काटियो। मैले एउटा उपहार पनि पाएँ। मेरो जन्मदिन आज। खुसीको भन्ने कि दु:खको के भन्ने। ६९ वर्ष पूरा गरेर ७० लागियो अब के खुसीको भन्ने,’ कार्यकर्तातिर हेर्दै हाँस्दै ओलीले थपे, ‘७० वर्ष लागियो के खुसी भन्ने। ८० पुग्न १० वर्ष बाँकी छ के खुसी भन्ने। एक बीस वर्षमा ९० पुग्छु, के खुसी भन्ने।’
बाँचेको र स्वास्थ्य पनि राम्रै भएकोले यो खुसीकै कुरा भन्नुपरेको ओलीले बताए। ओलीले यसो भनिरहँदा कार्यकर्ताले ताली बजाएका थिए।
‘मेरो जन्मदिनलाई यहाँहरूले उत्सवका रूपमा मनाउनुभएको छ सबैप्रति धन्यवाद ज्ञापन र आभार व्यक्त गर्छु। मैले अस्ती जुँगा अलि कालो हुँदै गएको छ भनेको थिएँ,’ उनले भने, ‘किन जुँगा कालो हुँदै गएको भन्या, तपाईंहरूको समर्थन, शुभकामना र आशीर्वादले हो।’
ओलीले यसो भनिरहँदा कार्यकर्ताले फेरि ताली पिटे।
प्रधानमन्त्री ओलीले थपे, ‘अहिले पनि १८ घण्टा काम गर्छु। यो तपाईंहरूको आशीर्वादले। युवाको आशीर्वाद भएपछि युवायुवा आउँदो रहेछ। मलाई पनि युवायुवा जस्तो भइरहेको छ।’
ओलीले आफू युवा संघको आजिवन सदस्य भएको पनि बताए। ‘तपाईंहरूलाई थाहा नै होला म युवा संघको आजिवन सदस्य छु,’ मञ्चबाटै कार्यकर्तालाई ओलीले सोधे, ‘थाहा छ होइन त?’ कार्यकर्ताले थाहा छ भन्दै फेरि ताली पिटे।
प्रधानमन्त्री ओलीले भनिहाले, ‘जो युवा संघको आजीवन सदस्य छ उ बुढो हुन मिल्यो? त्यसो भएर आज यो विशेष दिनमा म तपाईंहरूलाई धन्यबाद भन्न चाहन्छु।’
यसपछि प्रधानमन्त्री ओलीले केही पार्टीका कुरा पनि राखेका थिए।
जनवर्गीय संगठन र पार्टी तथा कुनै पनि तहका संगठनमा गुटबन्दी आवश्यक नभएको उनको भनाइ थियो। ‘यो प्रचण्ड-माधव नेपाल समूह हो र लुछाचुँडी हुन्छ?,’ उनले भने, ‘एकतावद्ध भएर साथीहरू अगाडि बढ्नुस्।’
यस अगाडि प्रधानमन्त्री ओलीले प्रतिनिधि सभा पुनर्स्थापना नहुने र चुनाव हुने दाबी गरेका थिए। पुनर्स्थापना भए के हुन्छ भन्ने अदालतलाई थाहा भएको उनको जिकीर थियो।
केहीगरी प्रतिनिधि सभा पुनर्स्थापना भए प्रचण्ड र माधव नेपाल प्रधानमन्त्री खोज्न हल बाँधेर हिँड्ने र कतै नपाएर आफैँकहाँ आइपुग्न बेर छैन भन्ने प्रधानमन्त्री ओलीको अभिव्यक्ति थियो।
