प्रदेश २ को नामकरणको प्रक्रिया सुरू भएको छ।
सरकार गठन भएको चार वर्षपछि दोस्रो पटक प्रदेश सभामा नामकरण गर्ने प्रक्रिया अघि बढाइएको हो। बिहीबार बसेको प्रदेश सभा बैठकमा प्रदेशको नामकरणका लागि चार प्रस्ताव पेस भएका हुन्।
शुक्रबार बस्ने प्रदेश सभा बैठकमा एमालेले प्रस्ताव दर्ता गराउने कार्यसूची छ। दल तथा सांसदहरूले ‘मधेस प्रदेश’, ‘जानकी प्रदेश’, ‘मध्य मधेस प्रदेश’ र ‘मिथिला भोजपुरा’ नामकरणका गर्न प्रस्ताव पेस गरेका छन्।
सत्तारूढ जनता समाजवादी पार्टी, नेकपा माओवादी केन्द्रले ‘मधेस प्रदेश’ प्रस्ताव गरेको छ।
प्रमुख प्रतिपक्षी दल लोकतान्त्रिक समाजवादी पार्टीले भने त्यसको समर्थन गरेको छ।
त्यस्तै, सत्तारूढ दल नेकपा एकीकृत समाजवादी पार्टीले प्रदेशको नाम ‘जानकी प्रदेश’ प्रस्ताव पेस गरेको छ।
कांग्रेसले ‘मिथिला-भोजपुरा’ नामको प्रस्ताव पेस गरेको छ भने कांग्रेसकै प्रदेशसभा सदस्यले राजेश्वरप्रसाद साहले ‘मध्य मधेश’ प्रदेश प्रस्ताव पेस गरेका छन्।
जसपाको तर्फबाट शैलेन्द्र कुमार यादव, माओवादी केन्द्रको तर्फबाट भरत प्रसाद साह, नेकपा एसको तर्फबाट प्रमोदकुमार यादव, नेपाली कांग्रेसको तर्फबाट शिवचन्द्र चौधरीले नामको प्रस्ताव पेस गरेका हुन्।
नामकरणसम्बन्धी प्रस्तावमा छलफल सकिएपछि प्रदेश सभामा राजधानीसम्बन्धी प्रस्ताव पेस हुनेछ।
नामकरणमा र स्थायी राजधानी टुंगो लगाउन प्रदेश सभाका दुई तिहाइ सदस्यको समर्थन आवश्यक छ।
प्रदेश सभामा अहिले १०४ जना सांसद छन्। जसपासँग ३७, लोसपासँग १६ र माओवादी केन्द्रसँग आठ सांसद छन्। त्यसैगरी संघीय समाजवादी पार्टीका एकजना सांसद छन्।
राजधानी जनकपुर राख्ने समबन्धमा सबै दल एकमत रहे पनि नामकरण सम्बन्धमा दल विभाजित देखिएका छन्।
-copy-1745411477.jpg)
-1746009348.jpg)
