प्रधानमन्त्री केपी शर्मा ओलीले बाघको संख्या बढाउन नहुने बताएका छन्।
शनिबार काठमाडौंमा दोस्रो राष्ट्रिय वन संवर्द्धन गोष्ठीलाई सम्बोधन गर्दै प्रधानमन्त्री ओलीले नेपालमा अहिले बाघको संख्या पर्याप्त रहेको र अब बढाउन नहुने बताएका हुन्।
'बाघको संख्या बढाउँदै जाने हो भनेदेखि मान्छे भागे हुन्छ। अब बाघको संख्या बढाउन सकिँदैन, मिल्दैन,' उनले भने।
प्रधानमन्त्री ओलीले आफूले बाघको संख्या बढाउन हुन्न भन्दा बुझ्दै नबुझी आलोचना गरिएको पनि बताए।
'यो बाघ भन्ने जन्तु फोटामा हेर्दा बडो गज्जवको हुन्छ। सामुन्नेमा पर्यो भने बस्। फोटामा बाघ हेरेर कुरा गरेर हुँदैन,' उनले भने।
बाघ धेरै भएको खण्डमा उसलाई आफ्नो क्षेत्र नपुग्ने र आहाराको खोजीमा आफ्नो क्षेत्रभन्दा बाहिर निस्कँदा नभेटिएपछि जे पायो त्यहीमाथि आक्रमण गर्ने प्रधानमन्त्री ओलीले बताए।
'बाघले कानूनको किताब पढेको हुँदैन, भ्रम राख्नु हुँदैन। मान्छे मार्नु हुँदैन, २० वर्ष जन्मकैद यताउति उसलाई थाहा हुँदैन। उसँग नङ्ग्रा छन्, दारा छ, बल छ, भोक लागेको छ। बाघ कुनै खेलाँची गर्ने चिज होइन,' उनले भने। -न्युज एजेन्सी नेपाल।
-1746009348.jpg)
