उत्तर कोरियाली शासक किम जोङ उन शुक्रबार शिखर वार्ताका लागि दक्षिण कोरियाको सीमामा रहेको गाउँमा जाँदै छन्।
सन् १९५३मा छुट्टिएपछि दुई कोरियाका नेताबीच पहिलो पटक दक्षिण कोरियाली भूमिमा वार्ता हुन लागेको हो।
दुबै देशले यो शिखर वार्ता हुने ठाउँको सजावट र खानाका माध्यमबाट पनि शान्तिको सन्देश दिने प्रयत्न गरिरहेका छन्।
शिखर वार्तापछि हुने रात्रीभोजका लागि विशेष मेनु तयार पारिएको दक्षिण कोरियाली राष्ट्रपति कार्यालय ब्लु हाउसले जनाएको छ।
दिउँसोको खाना भने किमले उत्तर कोरियाली सीमाको गाउँमा खानेछन्। खानापछि दुई नेताले सल्लाको बिरूवा रोप्नेछन्। त्यो बिरूवामा दुबै देशका पहाडको माटो राखिनेछ।
फेरि दुई नेताबीच वार्ता हुनेछ। साँझ उनीहरूले संयुक्त वक्तव्य जारी गर्नेछन्।
साँझ साढे ६ बजेपछि दुबै नेता र प्रतिनिधि मण्डल रात्रीभोजमा सहभागी हुने दक्षिण कोरियाली राष्ट्रपतिको कार्यालयले जनाएको छ।
उत्तर कोरियाले देशको प्रख्यात होटलका सेफलाई खाना पकाउन वार्तास्थलमा लैजाने बताएको छ।
उत्तरले सेफमात्र होइन चाउचाउ बनाउने मेसिन पनि सीमामा लैजाने भएको छ।
रात्रीभोजमा पाहुनाहरूलाई दुबै देशका लोकप्रिय खाना र सीमा क्षेत्रमा फल्ने अन्नबाट बनेका खाना दिइनेछ।
प्योङयाङ नायङम्यून
धेरै कोरियालीले मन पराउने प्योङयाङ नायङम्यून यो चिसो चाउचाउको परिकार हो। यस्तो खाना दक्षिणभन्दा उत्तरमा बढी लोकप्रिय छ।
चाउचाउको यही परिकार बनाउन उत्तर कोरियाले सेफ र मेसिनसँगै ल्याउन लागेको छ।
अक्टोपसको सलाद
सलाद बनाउने अक्टोपस तोङयोङ शहर नजिकको समुद्रबाट ल्याइनेछ। तोङयोङ दक्षिण कोरियामा तानाशाही व्यवस्था हुँदा प्रजातन्त्रको पक्षमा वकालत गर्ने संगितकार योन यी साङको शहर पनि हो।
स्वीस आलुको रोस्टी
खानाअघि खाइने स्विट्जरल्यान्डको यो परिकार कोरियन शैलीमा पकाइनेछ। किमलाई उनको किशोरावस्थाको सम्झना गराउन यो परिकार राखिएको बताइएको छ। किमले विद्यालय शिक्षा स्विट्जरल्यान्डमा पूरा गरेका थिए।
पाइन्सु
यो परिकार ममजस्तो गरी बनाइन्छ। बाहिरबाट केहीले बेरेर भित्र माछा र कांक्रोको किमा राखिएको हुन्छ। पाइन्सु बनाउने माछा र कांक्रो दक्षिण कोरियाली पूर्वराष्ट्रपति किम दाय जङको गृहनगरबाट ल्याइनेछ। जङले सन् २००० मा उत्तर र दक्षिण कोरियाका नेताबीच वार्ता गराएका थिए।
रोस्ट दालखोगी
यो समुद्री खानाको परिकार हो। दक्षिण कोरियाली शहर बुसानमा यो परिकार लोकप्रिय छ। राष्ट्रपति इनले बुसानमा बाल्यकाल बिताएका थिए।
बार्बिक्यू बिफ
छुङनाम शहरमा कोरियाली कम्पनी हुन्डाईको गाई फर्मबाट यो मासु ल्याइनेछ।
फिबिमफाब
यो कोरियनहरूले तरकारी र अन्डा हालेर बनाउने भातको एक परिकार हो। यो परिकार बनाउने दक्षिण कोरियाको खिमे प्रान्तबाट चामल ल्याइनेछ। सुप बनाउने हरियो सागपात सीमा क्षेत्रको हुनेछ।
(सिएनएनबाट अनुवादित)
