लन्डनमा एक ४० वर्षीय नेपालीको कोरोना भाइरस संक्रमणले मृत्यु भएको छ। गत सोमबार मृत्यु भएका प्रशान्त अर्याललाई कोरोना पोजिटिभ देखिएको अस्पतालले जनाएको छ।
दक्षिणपूर्वी लन्डनको प्लमस्टिडमा बस्दै आएका अर्यालको क्वीन एलिजाबेथ अस्पतालमा उपचार क्रममा निधन भएको थियो।
लन्डनमै बस्ने उनका आफन्त पदम कार्कीका अनुसार, बुधबार अस्पतालले परिवारलाई फोन गरेर कोरोना संक्रमण पुष्टि गरेको थियो। 'हिजो मात्र अस्पतालले फोन गरेर कोरोना सक्रमणका कारण मृत्यु भएको बतायो,' कार्कीले भने।
पारिवारिक स्रोतका अनुसार, अर्यालमा देखिएका लक्षण कोरोनासँग मिल्दाजुल्दा थिए। चितवन घर भएका अर्याल लामो समयदेखि लन्डनमै बस्दै आएका थिए। उनका श्रीमती, एक छोरा र एक छोरी छन्। उनीहरू लन्डनको आफ्नै घरमा आइसोलेसनमा बसिरहेका छन्। उनीहरूको स्वास्थ्यमा कुनै समस्या देखिएको छैन।
'आइसोलेसनमा बसेको परिवारमा अहिलेसम्म कोरोनाको लक्षण देखिएको छैन,' कार्कीले भने, 'हामीले आवश्यक दुरीमा रहेर उहाँहरूलाई सहयोग गरिरहेका छौं।'
अस्पतालमा बढ्दो चापका कारण परिवारले अर्यालको शव बुझ्न पाएको छैन। अस्पतालले परिवारलाई सम्पर्क गरेर बोलाउने बताएको छ।
लन्डनस्थित नेपाली दूतावासका उपनियोग प्रमुख शरदराज आरनले अर्यालको परिवार दूतावासको सम्पर्कमा आइसकेको बताए। 'राजदूत आफैंले उहाँकी श्रीमतीसँग सम्पर्क गरिसक्नुभएको छ। यो दुखद घडीमा हामी हाम्रो तर्फबाट हुन सक्ने सहयोग गर्ने छौं,' आरनले भने।
गत साता लन्डनकै एक ६६ वर्षीय पूर्वगोर्खा लीलाबहादुर राईको कोरोना संक्रमणबाट ज्यान गएको थियो।
-1756794700.JPG)
-1746009348.jpg)
