काठमाडौंमा ५ हजारको परीक्षण गर्दा एक जनामा पनि देखिएन कोरोना, समुदायमा नफैलिएकाे दाबी

विवेक राई

काठमाडौं, साउन ६

काठमाडौं उपत्यकामा कोरोना भाइरस समुदायमा फैलिएको एकीन गर्न ५ हजार जनाको परीक्षण गर्दा एकजनामा पनि संक्रमण देखिएको छैन।

इपिडियोमोलोजी तथा रोग नियन्त्रण महाशाखाका निर्देशक डा. वासुदेव पाण्डेले पाँच हजार जनाको परीक्षण गर्दा सबैको नतिजा नेगेटिभ आएको जानकारी दिए।

महाशाखाले उपत्यकामा कोरोना संक्रमण समुदायमा कुन स्तरमा फैलिएको छ भनेर पत्ता लगाउन दुई वटा रणनीति तय गरेर परीक्षण गरेको थियो।

महाशाखाका मेडिकल टेक्नोलोजिस्ट धनप्रसाद पौडेलले सुरुमा १२ वटा ठाउँबाट १२ सय बढीको परीक्षण गरिएको र दोस्रो चरणमा ५ हजार जनाको परीक्षण गरिएको बताए। उनले तीन जिल्लालाई नै समेटेर १२ ठाउँको परीक्षण गर्दा जम्मा तीन जनामा संक्रमण देखिएको जनाए।

'यी मध्ये टोखा नगरपालिकाको हरियाली वस्तीका तीन जनामा मात्र संक्रमण देखियो। बाँकी सबै नतिजा नेगेटिभ आयो,' उनले भने।

त्यसपछि दोस्रो चरणको रणनीति अनुसार महाशाखाले ५ हजार जनाको परीक्षण गर्ने गरी तयारी अघि बढायो। परीक्षणलाई वैज्ञानिक बनाउन भन्दै महाशाखाले निश्चित समूहहरूलाई लक्षित गरेर परीक्षण गर्‍याे।

पौडेल भन्छन्, 'हामीले परीक्षण गरेकाे ५ हजारको समूहमा तरकारी पसल, दूध पसल, हजाम, बैंक, मालपोत, यातायात र पब्लिक क्न्ट्याक्ट बढी हुने ठाउँहरूको व्यक्ति हुनुहुन्छ।'

निर्देशक डा. पाण्डेले पनि ५ हजार जनाको परीक्षण गर्दा शून्य संक्रमित देखिएपछि यसले समुदायमा संक्रमण फैलिनसकेको बताए।

'अब यसले उपत्यकामा अहिलेसम्म समुदायमा संक्रमण छैन भन्ने प्रष्ट पारेको छ,' उनले दाबी गरे। अब उपत्यकामा परीक्षण रणनीति फरक पार्ने महाशाखाको तयारी छ। पाण्डेले अब उपत्याकामा पनि 'सेरो प्रिभिलेन्स' सर्वेक्षण गर्न लागिएको बताए।

यो सर्वेक्षणबाट समुदायमा कति मानिस संक्रमणबाट प्रभावित छन् भन्ने थाहा हुन्छ। यसका लागि मानिसहरूको रगतको नमूना संकलन गरिन्छ जसले कुनै व्यक्तिमा पहिले संक्रमण भए/नभएको एकीन गर्छ। यो सर्वेक्षण महाशाखाले उपत्यकासहित सातै प्रदेशमा गर्ने तयारी गरेको छ।

प्रदेशहरूमा भने बढी संक्रमण भएका जिल्लाहरूलाई प्राथमिकता दिएर परीक्षण गर्ने भनिएको छ। अहिले उपत्यकामा समुदायमा संक्रमण नभएको दृश्य आएपनि परीक्षणलाई भने नरोक्ने निर्देशक पाण्डेले बताए।

उनले परीक्षणलाई विभिन्न रणनीति अपनाएर निरन्तरता दिइने जनाए। 'यत्रो जनसंख्या भएको ठाउँमा यति परीक्षणले कहाँ पुग्छ? हामी थप परीक्षण गर्ने रणनीति तय गर्दैछौं' उनले भने।

यस्तै अब विदेशबाट आउनेहरूको पनि अनिवार्य पिसिआर परीक्षण गरिने उनले बताए। महाशाखाले अब विदेशबाट आउनेहरूको पिसिआर गरेर मात्र उनीहरूलाई घर पठाइने जनाएको छ।

स्वास्थ्य मन्त्रालयका प्रवक्ता डा. जागेश्वर गौतमले पनि सोमबारको नियमित प्रेस ब्रिफिङमा यसबारे जानकारी गराइसकेका छन्। सरकारको रणनीति अनुसार अब विदेशबाट आउनेहरूलाई अनिवार्य होल्डिङ सेन्टरमा पाँच दिन राखेर छैठौं दिनमा पिसिआर परीक्षण गर्ने र नेगेटिभ देखिएका व्यक्तिलाई घर पठाइने छ।

सरकारले भदौ १ गतेदेखि अन्तर्राष्ट्रिय उडान खुला गर्ने निर्णय गरेसँगै परीक्षणमा थप कडाइ गर्नुपर्ने देखिएको छ। विज्ञहरूले समेत अहिले संक्रमणको दर हेर्दा केही राम्रो अवस्थाको संकेत देखिएको भन्दै यसलाई यथास्थितिमा नियन्त्रण गर्दै जोखिम घटाउँदै लैजानुपर्ने बताएका छन्।

उनीहरूले अब संक्रमणलाई नियन्त्रण गर्न भारत लगायत तेस्रो मुलुकबाट आउनेहरूलाई नै बढी निगरानी राख्नुपर्ने तर्क राखेका छन्। सोही अनुरूप सरकारले अब हवाइ र स्थल मार्ग दुबैबाट स्वदेश आउने व्यक्तिको पिसिआर परीक्षण गर्ने भएको छ।

विदेशबाट आउनेको होल्डिङ सेन्टरमा निश्चित केही दिन राखेर परीक्षण गर्ने र भारतबाट आएकालाई भने सुरुमै परीक्षण गरेर मात्र सम्बन्धित जिल्लाका क्वारेन्टिनमा पठाइने भनिएको छ।

प्रकाशित मिति: मंगलबार, साउन ६, २०७७ ०४:४०

सिफारिस

ऊर्जा सुरक्षामा कस्तो छ नेपालको अवस्था?