दाङको घोराही उपमहानगरपालिकाले कोरोना संक्रमणबाट ज्यान गुमाएका ५२ जनाका परिवारलाई जनही ५० हजार रुपैयाँ प्रदान गरेको छ।
बिहीबार कार्यक्रमको आयोजना गरी नगरका कोरोना संक्रमणबाट मृत्यु भएका ५२ जनाको घर परिवारलाई ५० हजारका दरले २६ लाख रुपैयाँ आर्थिक साहेता प्रदान गरिएको हो।
मेयर नरुलाल चौधरीले मृतकका परिवारलाई जनही ५० हजारका दरले चेक हस्तान्तर गरेका हुन्।
कोरोना संक्रमणका कारण मृत्यु भएको परिवारको सहयोगका लागि उक्त आर्थिक सहायता गरिएको मेयर चौधरीले बताए।
‘कोरोना संक्रमणबाट मृत्यु हुँदा मानविय क्षतिसँगै आर्थिक क्षति पनि भएको छ। त्यसैले पीडित परिवारलाई थोरै भएपनि सहयोग पुगोस् भन्ने उद्देश्यले सहयोग गर्ने निर्णय गरेका हौं,’ चौधरीले भने,‘ आशा छ उहाँहरूले सहयोग रकमको सही सदुपयोग गर्नु हुने छ।’
त्यसक्रममा मेयर चौधरीले अझै पनि कोरोना संक्रमणको अवस्था सामान्य नभएको र नयाँ भेटियन्टको जोखिम समेत रहेकाले स्वास्थ्य सतर्कता अपनाउन नागरिकलाई आग्रह पनि गरे।
कोरोना संक्रमणबाट मृत्यु भएको भएपनि प्रक्रियामा रहेका १५ परिवार र नयाँ दर्ता भएका २० परिवारलाई अर्काे चरणमा राहत वितरण गरिने घोराही उपमहानगरपालिका स्वास्थ्य शाखा प्रमुख नारायण घर्तीले जानकारी दिए।
मृतकको नागरिकता वा मतदाता नामावली घोराही मै भएका व्यक्तिहरूको परिवारलाई मात्र राहत रकम उपलब्ध गराएको घर्तीले बताए।
त्यस्तै लुम्बिनी प्रदेश सरकारले कोरोना संक्रमणबाट मृत्यु भएका परिवारहरूलाई राहत एक लाख रुपैयाँ दिने निर्णय गरेको छ।
