संयुक्त अरब इमिरेट्सको अलबसामा अलपत्र अवस्थामा रहेको आफ्नो छोराको शव नेपाल ल्याउन आर्थिक सहयोग गरिदिन सिन्धुपाल्चोक खाडीचौरका भुजेल दम्पतीले आग्रह गरेका छन्।
हाल काठमाडौंको काँडाघारीमा अस्थायी रूपमा बसोबास गर्दै आएका श्याम बहादुर भुजेल र उनकी श्रीमती बुद्धीमाया भुजेलले छोराको शव नेपाल ल्याउन आर्थिक समस्या परेको भन्दै सहयोगका लागि अपील गरेका हुन्।
गत भदौ अन्तिममा छोरा विकास भुजेल पर्यटक भिसाबाट युएई पुगेको मृतककी आमा बेद्धीमायाले बताइन्। अलग भिसामा गएको छोरा काम गर्न थालेको र दसैंसम्म सम्पर्कमा रहे पनि त्यसपछि सम्पर्कविहीन भएको उनले बताइन्।
रोजगारी भिसामा गएको अवस्थामा मृतकको शव नेपाल ल्याउन समस्या नहुने भए पनि पर्यटक भिसामा दुवई पुगेर काम गर्न थालेका कारण उनको शव ल्याउन झण्डै ३ लाख रुपैंया खर्च लाग्ने र उक्त रकम आफूहरूसँग नभएको मृतक विकासका बावु श्याम बहादुर भुजेलले बताए।
‘छोराले धेरै करकर गरेर कता के मिलाएर गएको थियो, अहिले शव पनि ल्याउन सकिएन, सहयोगीको साथ पाए कम्तीमा मृत छोराको शव ल्याएर अन्तिम संस्कार गर्ने थियौं,’ भुजेलले भने।
नेपाल बंगलादेश बैंकको काँडाघारी शाखामा रहेको श्याम बहादुर भुजेलको बैंक खाता नम्बर ०९६००२९३२ डब्ल्यू मा सहयोग रकम जम्मा गरिदिन उनले आग्रह गरेका छन्। साथै सहयोगका लागि आफ्नो सम्पर्क नम्बर ९८८७०८८७४२ मा फोन गर्न पनि उनले आग्रह गरेका छन् ।
संयुक्त अबर इमिरेट्सका लागि नेपाली राजदूत कृष्णप्रसाद ढकालले पनि २१ वर्षीय विकास भुजेलको मृत्यु भएको खबर स्थानीय प्रहरीले धेरै पहिले जानकारी गराए पनि बल्ल परिवारसँग सम्पर्कमा पुगिएको पुष्टि गरेका छन्।
पर्यटक भिसामा आएका उनको शव ल्याउन व्यक्तिगत रुपमा आफूले सघाउनेसमेत उनले प्रतिबद्धता जनाए।
संयुक्त अरब इमिरेट्समा वेद अर्याल तथा अन्य सहयोगीले भुजेलको शव नेपाल पठाउनका लागि समन्वय गरिरहेका छन्। त्यहाँबाट आर्थिक सहयोग गर्न चाहनेहरुले अर्याललाई सम्पर्क गर्न सक्ने परिवारले जनाएको छ।
गत भदौमा पर्यटक भिसामा दुबई पुगेका भुजेलको दसैं लगत्तै मृत्यु भएको थियो। छोराको मृत्यु भएको खबर भुजेल दपत्तीले गत साता मात्र पाएका थिए।
उनीहरुले रोजगारीका लागि विदेश जान चाहने जो कोहीलाई पनि आफ्नो छोराको जस्तो अवस्था नआओस भन्दै अनिवार्य रुपमा श्रम स्वीकृति लिएर मात्र विदेश जान आग्रह गरेका छन्।
-1746009348.jpg)
