दाङमा जंगली कुकुरले टोकेका भनिएका दुई बालबालिकाको उपचारका क्रममा मृत्यु भएको छ।
घोराही उपमहानगरपालिका–१० उत्तर अमराईका निलम चौधरी र गम्भीर वलीको उपचारका क्रममा मृत्यु भएको हो।
गम्भीरका बुवा गिरिराज वलीका अनुसार मंसिर २ गते बिहान साढे १० बजेतिर खेलिरहेका बेला निलम र गम्भीरलाई कुकुरले टोकेको थियो।
मंसिर २२ गते नरेश चौधरीकी ६ वर्षीया छोरी निलम चौधरी र २४ गते घोराही सोही ठाउँकै गिरिराज वलीका ५ वर्षीय छोरा गम्भीर वलीको मृत्यु भएको जिल्ला प्रहरी प्रमुख एसपी रामबहादुर केसीले सेतोपाटीलाई बताए।
कुकुरले टोकेको १९ दिनपछि चौधरीको घोराहीस्थित राप्ती स्वास्थ्य विज्ञान प्रतिष्ठानमा र वलीको २३ दिनपछि लखनउमा उपचारका क्रममा मृत्यु भएको खबर प्राप्त भएको एसपी केसीले जानकारी दिए।
‘दुई बालबालिकाको कुकुरले टोकेर मृत्यु भएको भन्ने खबरपछि मैले स्थानीय प्रहरीलाई घटनाबारे बुझ्न पठाएको थिएँ,’ एसपी केसीले भने, ‘घरका अभिभावकले विद्यालय बिदाको समयमा खेल्दै गरेका बालबालिकालाई जंगली कुकुरले टोकेको हुन सक्ने आशंका गर्नुभएको रहेछ।’
घोराही–१० का वडाध्यक्ष दीपक पाण्डेले पनि जंगली कुकुरले टोकेर दुई बालबालिकाको मृत्यु भएको भन्ने कुरा आफूले सुनेको बताए।
‘उत्तर अमराईनजिकै वन जंगल रहेको र त्यहीँबाट आएको जंगली कुकुरले टोकी घाइते भएका उनीहरूको उपचारका क्रममा २१/२२ दिनपछि मृत्यु भएको भन्ने छ,’ वडाध्यक्ष पाण्डेले भने,‘ बालिकाको घोराहीमा र बालकको लखनउमा उपचारका क्रममा मृत्यु भएको भन्ने कुरा मलाई स्थानीयले खबर गरेका छन्।’
वडाध्यक्ष पाण्डेका अनुसार बालकलाई रेबिजको सुइँ लगाएर सञ्चो भएको ठानेर घर फर्काइएको थियो। एकाएक फेरि ज्वरोसहित स्वास्थ्य समस्या भएपछि फेरि उपचारका लागि लगिएको र त्यही क्रममा मृत्यु भएको भन्ने कुरा स्थानीय तथा आफन्तले गरेको वडाध्यक्ष पाण्डेले जानकारी दिए।
