अमेरिकी राष्ट्रपति डोनाल्ड ट्रम्पका कारण क्यानडाको चुनावमा प्रभाव पारेजस्तै अस्ट्रेलियाको आम निर्वाचनमा पनि असर परेको छ।
अस्ट्रेलियामा विपक्षी दल लिबरल पार्टीले जित्ने चुनावी प्रक्षेपण थियो। तर सो पार्टीका नेता पिटर डटनले ट्रम्पको तारिफ गर्दा यसको फाइदा प्रधानमन्त्री एवं सत्तारूढ दलका नेता एन्थोनी अल्बानिजलाई भएको हो।
शनिबार सम्पन्न निर्वाचनमा दोस्रो कार्यकाल पनि प्रधानमन्त्री अल्बानिजको पार्टीले जितेको छ। चुनावी प्रक्षेपणहरूलाई गलत साबित गर्दै दोस्रो कार्यकालका लागि अल्बानिजको सरकारलाई अस्ट्रेलियाका नागरिकहरूले अनुमोदन गरेका छन्।
लेबर पार्टीले सरकार गठनका लागि आवश्यक बहुमत ७६ बढी सिटमा जितेको अन्तर्राष्ट्रिय सञ्चारमाध्यमहरूले जनाएका छन्।
अस्ट्रेलियामा विपक्षी दल लिबरल पार्टी भनिए पनि यसको विचारधारा ट्रम्प नेतृत्वको रिपब्लिक पार्टीको जस्तो दक्षिणपन्थी (रूढीबादी) छ।
ट्रम्पले दोस्रो कार्यकाल थालेपछि विपक्षी दलका नेता डटनले ट्रम्पलाई महान् विचारक र सौदागर भनेर तारिफ गरेका थिए।
लिबरल पार्टीकै एक जना सांसदले त ट्रम्पको ‘मेक अमेरिका ग्रेट अगेन’ नारा जस्तै ‘मेक अस्ट्रेलिया ग्रेट अगेन’ भन्ने नारा दिएकी थिइन्।
त्यसैकारण अल्बानिजको लेबर पार्टीले चुनाव जितेको अन्तर्राष्ट्रिय समाचार संस्था रोयटर्सले जनाएको छ।
ट्रम्पले आफ्नो दोस्रो कार्यकालमा अस्ट्रेलियन स्टिल र अल्मुनियममा २५ प्रतिशत भन्सार दर लगाएका थिए। सबै देशलाई लगाइको १० प्रतिशतको भन्सार दरले अस्ट्रेलियाको व्यापारलाई पनि असर गरेको छ।
अल्बानिज अस्ट्रेलियामा दुई दशकयता पहिलो पटक लगातार दुई कार्यकाल प्रधानमन्त्री बन्ने व्यक्ति बनेका छन् भने लेबर पार्टी लगातार दोस्रो कार्यकाल सरकारमा रहने पार्टी बनेको छ।
लिबरल पार्टीका प्रवक्ता एवं सिनेटर जेम्स पाटरसनले ट्रम्प फ्याक्टरका कारण कन्जर्भेटिभ प्रचारलाई असर पुगेको बताए।
‘क्यानडामा कन्जर्भेटिभहरूलाई नराम्ररी असर पुगेको थियो। यहाँ पनि ट्रम्प फ्याक्टरले असर गरेको लाग्छ, तर कति ठूलो असर पुगेको हो भन्ने केही घटनामा थाहा हुन्छ,’ उनले एबिसी टेलिभिजनसँग भनेका थिए।
विपक्षी नेता पिटर डटनले पराजय स्वीकार गरेका छन्। उनले प्रधानमन्त्री अल्बानिजलाई बधाई समेत दिएका छन्।
'चुनाव प्रचार प्रसारमा हामीले कमजारी गर्यौं। हारको जिम्मेवारी म लिन्छु। यो लेबर पार्टीका लागि ऐतिहासिक क्षण हो,' ब्रिसबेनमा आफ्ना समर्थकहरूलाई सम्बोधन गर्दै डटनले भने।
अन्तर्राष्ट्रिय समाचार संस्था रोयटर्सका अनुसार विपक्षी दलले अघिल्लो आम निर्वाचनको तुलनामा यसपटक आफ्नो सिटसमेत गुमाएको छ।
त्यति मात्रै होइन विपक्षी नेता डटन आफै पनि लेबर पार्टीका उम्मेदवारसँग पराजित भएका छन्।
उनी क्वीन्सल्याण्डको डिक्सन सिटमा लेबर पार्टीका अली फ्रेन्ससँग पराजित भएका हुन्।
क्यानडामा पनि हालै भएको चुनावमा ट्रम्प फ्याक्टरकै कारण सत्तारूढ दलले निर्वाचन जितेको थियो।
मार्क कार्नी नेतृत्वको लिबरल पार्टीले क्यानडामा जित हासिल गरेको थियो। ट्रम्पसँग व्यापार युद्ध चलिरहेको बेलामा कार्नीले मार्चमा प्रधानमन्त्रीको रूपमा शपथ लिएका थिए।
युद्धले आफ्नो दललाई फाइदा हुनेभएपछि उनले संसद विघटन गरी चुनावको घोषणा गरेका थिए। कार्नीले विपक्षी दल कन्जर्भेटिभ पार्टीका नेता पियर पलिएभलाई ट्रम्पसँग तुलना गरी प्रचार गरेका थिए। जसको फाइदा कार्नीको लिबरल पार्टीलाई भएको थियो।
यो पनि: अस्ट्रेलियाको आम निर्वाचनमा सत्ताधारी लेबर पार्टी विजयी
-1746279533.jpg)
