बाँकेको डुडुवा गाउँपालिका–६ का ४० वर्षीय इरफान अहमद शेखको खाताबाट शंकास्पद कारोबार भइरहेको थियो।
शेखको खातामा नगद रकम जम्मा हुनासाथ त्यो रकम अरू खातामा ट्रान्सफर हुन्थ्यो। विद्युतीय माध्यममार्फत् विभिन्न व्यक्ति तथा संस्थाहरूको खातामा त्यो रकम पठाइन्थ्यो।
शेखले बैंकमा खाता खोल्ने क्रममा भरेको केवाइसीमा भने आफ्नो वार्षिक आम्दानी सामान्य देखाएका थिए। उनले केवाइसी फर्म भर्दा सामान्य व्यापार र व्यवसाय देखाएका थिए। तर, कारोबार अप्रत्यासित रूपमा भइरहेपछि उनी शंकाको घेरामा परेका थिए।
ठूलो मात्रामा भइरहेको रकमको त्यस्तो कारोबारपछि नेपाल राष्ट्र बैंक वित्तीय जानकारी इकाई काठमाडौं बालुवाटारले गत साउन ७ गते जिल्ला प्रहरी कार्यालय बाँकेमा शेखको खाताबाट भइरहेको शंकास्पद कारोबारबारे पत्राचार गर्छ।
छोटो अवधिमै शेखको खाताबाट चार करोड ९२ लाख ८४ हजार २९६ रुपैयाँँ अरू व्यक्ति र संस्थाको खातामा तत्कालै पठाइएको थियो। यो विषयमा प्रहरीले सूक्ष्म रूपमा अनुसन्धान गरिरहेको थियो। शेखको आम्दानी र बैंकमार्फत् भइरहेको कारोबार निकै अमिल्दो थियो। शेख अवैध हुन्डी कारोबारमा माध्यमको रूपमा संलग्न रहेको हुनसक्ने तथ्य प्रहरी अनुसन्धानबाट खुल्यो।
बाँकेका प्रहरी प्रमुख एसपी अंगुर जिसी यो घटनाको अध्ययन आफै पनि गरिरहेका थिए।
बैंकबाट उपलब्ध शेखको खाताबाट भइरहेको कारोबार र उनले खाता खोल्दा भरेको केवाइसी फर्म आवश्यक कागजात आफै अध्ययन गरे।
बाँके प्रहरीले हुन्डी कारोबारी भएको आशंकासहित शेखविरूद्ध जिल्ला अदालतबाट भदौ ३० गते पक्राउ अनुमति लिइसकेको थियो। तर, पक्राउ पुर्जी जारी भइसक्दा उनी फरार थिए। एसपी जिसी आफै खटिएर शेखलाई पुस ११ गते नियन्त्रणमा लिएका थिए।
बाँकेका प्रहरी प्रवक्ता डिएसपी दीपक पातलीका अनुसार प्रारम्भिक अनुसन्धानबाट शेखविरूद्ध हुण्डी सम्बन्धी मुद्दा दर्ता गरी अनुसन्धान कार्य भइरहेको छ। थप सोधपुछ र अनुसन्धान हुन बाँकी रहेको डिएसपी पातलीले बताए।
‘केवाइसी फर्ममा अनुमानित वार्षिक ६ लाखको कारोबार उल्लेख गर्नु र आफ्नै खाताबाट छोटो अवधिमै झन्डै पाँच करोडको कारोबार गरेपछि आशंका बढ्नु स्वाभाविक हो,’ अर्का एक प्रहरी अधिकारीले भने, ‘शेख हुन्डी कारोबारमा कन्डक्टरका रूपमा प्रयोग भएको प्रारम्भिक अनुसन्धानबाट खुल्न आउँछ।’
-1756794700.JPG)
-1746009348.jpg)
