ग्लोबल टी-२० क्यानडमा नेपालका तीव्र गतिका बलर सोमपाल कामी आबद्ध विनिङपेग हग्स फाइनलमा प्रवेश गरेको छ।
हग्सले शनिबार राति सकिएको खेलमा ब्राम्टन वुल्भ्सलाई ७ विकेटले पराजित गर्दै फाइनलमा स्थान पक्का गरेको हो।
पहिले ब्याटिङ गरेको ब्राम्टनले ७ विकेटको २०० रन जोड्यो। विनिङपेगले अन्तिम बलमा लक्ष्य भेट्टायो। उसका लागि शइमान अनवारले ५२ रन र जेपी डुमिनीले नटआउट ५० रन जोड्यो।
उपाधिका लागि विनिङपेग र भानकुभर नाइट्सबीच आइतबार खेल हुनेछ।
विनिङपेगले नेपाली बलर सोमपाललाई अहिलेसम्म एक खेलमा मात्र मौका दिएको छ। समूह चरणमा सोमपालले एडमन्टन रोयल्यविरुद्ध २ ओभर बलिङ गर्दा ३३ रन दिएका थिए।