दक्षिण अफ्रिकाले गतिला क्रिकेटरहरू संसारलाई दिएको छ। रंगभेदका कारण २१ वर्षसम्म प्रतिबन्धित हुँदा उसका थुप्रै क्रिकेटर रेकर्ड बनाउनबाट चुके पनि। प्रतिबन्धित भएपछि केही क्रिकेटरले आफ्नो करियरका लागि अन्य देश समेत रोजे।
२१ वर्षको प्रतिबन्धपछि सन् १९९२ मा दक्षिण अफ्रिका विश्व क्रिकेटमा पुनः फर्कियो। यसपछि फेरि दक्षिण अफ्रिकाबाट राम्रा क्रिकेटरहरू उदाए। यसमा लान्स क्लूजनर पनि एक हुन्। उनी एक प्रतिभाशाली क्रिकेटरका रूपमा आए।
उनी उत्कृष्ट अलराउण्डरमध्येमा पर्छन्। उनलाई विशेषगरी सन् १९९९ को विश्वकपका लागि विशेष याद गरिन्छ।
करियरको सुरूवात उनले बलरका रूपमा गरे। त्यसैले उनी अन्तिम खेलाडीका रूपमा ब्याटिङ गर्न मैदानमा आउँथे। तर पछि उनको स्लग प्रहार गर्ने शैली संसारभर चर्चित भयो। यसले उनलाई उत्कृष्ट अलराउण्डरहरूको रूपमा परिचित गरायो।
सन् १९९९ सम्म उनको सर्वश्रेष्ठ समय रह्यो। यो समयसम्म उनी यस्ता खेलाडी बनिसकेका थिए जसका लागि असम्भव भन्ने केही थिएन। विरोधी टोली उनी आउट नहुँदासम्म जितका बारेमा निश्चित हुन सक्दैनथे।
यसको प्रमाण सन् १९९६मा भारतविरूद्ध उनले खेलेको पहिलो टेस्ट हो। ४ सेप्टेम्बर, १९७१ मा डरबनको नटालमा जन्मिएका लान्सले पहिलो टेस्टमा नै आफ्नो परिचय दिए।
कोलकोतामा खेलिएको यस म्याचमा उनले दोश्रो पारीमा २१.३ ओभर बलिङ गर्दै ६४ रन खर्चेर ८ विकेट लिएका थिए। उनको उत्कृष्ट बलिङमा दक्षिण अफ्रिकाले भारतविरूद्ध ३२९ रनको जित हासिल गर्यो। यस पारीमा उनका साथी ग्यारी कस्टर्नले दुबै पारीमा शतक बनाएका थिए। क्लुजनरले यस खेलमा मात्र १० रन जोडेका थिए भने दोश्रो पारीमा ब्याटिङको मौका पाएनन्।
त्यस्तै सन् १९९९ मा इङ्ल्याण्डमा भएको विश्वकप क्रिकेटमा दक्षिण अफ्रिका सेमिफाइनलबाटै घर फर्कियो तर टोलीलाई त्यहाँसम्म पुर्याउन उनको महत्वपूर्ण योगदान रह्यो।
यस प्रतियोगितामा उनले ४ वटा म्यान अफ द म्याच अवार्ड जिते र केवल दुई पटकमात्र आउट भए। यस प्रतियोगितामा उनले १४०.५० को औषत र १२२.१७ को स्ट्राइक रेटले ९ म्याचमा ८ पारी खेल्दै २८१ रन बनाए। यस्तै २०.५८ को औषतले १७ विकेट लिएका थिए। यसमा केन्याविरूद्ध २१ रनमा ५ विकेट लिदैं उत्कृष्ट बलिङ गरे।
यसरी सन् १९९९ को विश्वकपमा नायक बनेका उनले सन् २००३ को विश्वकपमा आफ्नो टोलीलाई सुपरसिक्समा पुर्याउन सकेनन्। यसपटकको विश्वकपमा उनको टोली श्रीलंकासँग मात्र १ रनले हार्दै विश्वकपबाट बाहिरिनु परेको थियो। यस म्याचमा उनले ८ बलमा केवल १ रन जोडेका थिए। त्यसपछि उनलाई टोली विश्वकपबाट बाहिरिनुको कारक मानियो।
यसरी एउटै विश्वकपमा नायक र खलनायकका रूपमा उनलाई हेरियो। हाल उनी दक्षिण अफ्रिकाका ब्याटिङ प्रशिक्षक हुन्।
