सियारी राइनोज् तिलोत्तमा प्रिमियर लिगबाट बाहिरिएको छ।
रुपन्देहीको तिलोत्तमा नगरपालिकामा जारी लिगको शनिबारको खेलमा सुपर ११ भैरहवासँग पराजित हुँदै सियारी राइनोज् लिगबाटै बाहिरिएको हो।
शनिवारको खेलपछि पाल्पाली लिजेन्ट्स र मणिग्राम किङ्स सेमिफाइनलमा पुग्ने पक्का भएको छ।
शनिबार सम्पन्न दोस्रो खेलमा सुपर ११ भैरहवासँगको खेलमा सियारी राइनोज् ४ विकेटले पराजित भएको हो।
यसअघिका सबै खेलमा हार व्यहोरेको भैरहवाले शनिबारको खेलमा भने जित निकालेको हो।
यता सियारीको हारसँगै पाल्पाली लिजेन्ट्स र मणिग्राम किंङ्सले सेमिफाइनलमा आफ्नो स्थान सुरक्षित गरेका हुन्।
टस जितेर ब्याटिङ रोजेको सियारीले १९ दशमलव २ ओभरमा सबै विकेट गुमाउँदै १ सय ३९ रनको योगफल तयार पारेको थियो।
जवाफमा भैरहवाले अन्तिम ओभरको पाँचौं बलमा १ सय ४० रनको लक्ष्य भेटेको थियो।
भैरहवाको जितका लागि राहुल विकले सर्वाधिक ४६ रन र सहव आलमले ३२ रनको योगदान गरे।
प्रतियोगितामा भैरहवाका साहव आलम म्यान अफ द म्याच र राहुल विक मष्ट भ्यालुएवल खेलाडी घोषित भए।
यसअघि शनिबार सम्पन्न पहिलो खेलमा तिनाउ टाइटन्सलाई ४६ रनले पराजित गर्दै रुपन्देही पल्टन्सले जित निकालेको थियो।
टस जितेर व्याटिङ गरेको रुपन्देही पल्टन्सले निर्धारित २० ओभरको खेलमा ६ विकेटको क्षतिमा १ सय ७२ रनको योगफल तयार पारेको थियो।
रुपन्देही पल्टन्सको जितका लागि विराट भण्डारीले ६१ रनको योगदान गरे भने कुशल भुर्तेलले ५९ रन बनाए।
जवाफमा व्याटिङ थालेको तिनाउ टाइटन्स ९ विकेटको क्षतिमा १ सय २६ रनमा समेटिएको थियो।
तिनाउ टाइटन्सका मानबहादुर थापाले ५३ रनको योगदान गरे पनि अन्य व्याटस् म्यान खासै चल्न नसक्दा हार व्यहोर्नु पर्यो ।
प्रतियोगितामा रुपन्देही पल्टन्सका विराट भण्डारी म्यानअफ द म्याच घोषित भए भने कुशल भुर्तेल मष्ट भ्यालुएवल प्लेयर बने।
प्रतियोगिता अन्तर्गत आइतबारको पहिलो खेलमा बुटवल युनाइटेड र तिनाउ टाइटन्स भिड्ने छन् भने दोस्रो खेल एक्स्पर्ट रोयल शंकरनगर र सुपर ११ भैरहवाकाबीच हुनेछ।
