अन्तर्राष्ट्रिय क्रिकेट काउन्सिल (आइसिसी)ले आइसिसी टी-२० विश्वकप २०२१ र आइसिसी क्रिकेट विश्वकप २०२३ को छनोट प्रतियोगिताका विभिन्न सिरिज स्थगित गरेको छ।
आइसिसीले संसारभर फैलिरहेको कोरोनाभाइरसको संक्रमणका कारण सिरिजहरु स्थगित गरेको हो।
आइसिसीले विश्व क्रिकेट परिवारको स्वास्थ्यलाई प्राथमकितामा राखेर सिरिजहरु स्थगित गरिएको बताएको हो। आइसिसीले जुन ३० सम्मका सम्पूर्ण छनोट सिरिज स्थगित गरेको छ भने त्यसपछिका केहि सिरिज पनि स्थगित गर्ने वा नगर्ने विषयमा समिक्षा गर्ने भएको छ।
आइसिसीले विश्वभर हिडडुल गर्न प्रतिबन्ध लगाइएको अवस्थामा सदस्य राष्ट्रसँग छलफल गरेको बताएको छ।
आइसिसीको निर्णयसँगै नेपालका तीन वटा सिरिज स्थगित भएका छन् भने एक सिरिज गर्ने कि नगर्ने विषयमा समिक्षा गरिने भएको छ।
आगामी जुन २६ देखि २ जुलाईसम्म मलेसियामा हुने तय आइसिसी मेन्स टी-२० विश्वकप छनोट बी प्रतियोगिता स्थगित भएको छ। जहाँ नेपालसँगै भुटान, चीन, मलेसिया, म्यानमार र थाइल्यान्डले प्रतिस्पर्धा गर्ने तय थियो।
यस्तै आइसिसी क्रिकेट विश्वकप लिग-२ अन्तर्गत नेपालले खेल्न दुई वटा त्रिकोणात्मक सिरिज पनि स्थगित भएको छ।
अप्रिल २० देखि २७ सम्म नामिबियामा हुने तय नेपाल, नामिबिया र स्कटल्यान्डबीचको सिरिज स्थगित भएको छ। यो सिरिज यसअघि नै प्रभावित भइसकेको थियो। कोरोनाका कारण नेपालसहितका टिमले तयारी गर्न पाएका थिएनन्।
यस्तै जुन ९ देखि १६ सम्म पपुवा न्युगिनीमा हुने तय नेपाल, युएई र पपुवा न्युगिनीबीचको त्रिकोणात्मक सिरिज पनि स्थगित गरिएको छ।
३ जुलाई देखि ११ जुलाइसम्म स्कटल्यान्डमा हुने त्रिकोणात्मक सिरिज सञ्चालन गर्ने कि स्थगित गर्ने विषयमा समिक्षा गर्ने आइसिसीले जनाएको छ। यो सिरिजमा नेपाल, नामिबिया र स्कटल्यान्डले प्रतिस्पर्धा गर्ने तय छ। यस विषयमा आइसिसीले स्थिति हेरेर पछि निर्णय लिने बताएको छ।